طه دسوقي يكشف أصعب مشاهده في حالة خاصة.. ووجه التشابه مع شخصية نديم
تحدث الفنان طه دسوقي، عن أصعب المشاهد التي جسدها في مسلسل حالة خاصة، إلى جانب التشابه بينه وبين شخصية نديم التي جسدها بالعمل.
وقال طه دسوقي خلال لقاء له عبر منصة واتش ات: نديم كان معظم الحاجات بيعملها لأول مرة، أول مرة بتكون بالنسبة لنديم أكتر من الشخص العادي، علشان بالنسبة له خروج عن السيستم بتاعه وأول مرة دايمًا يتكون أصعب مرة، أول مرة يحب وأول مرة يترافع، وأول مرة يشتغل في مجموعة.
طه دسوقي يكشف أصعب مشهد جسده في حالة خاصة
وعن أصعب المشاهد التي جسدها قال: مشهد الانترفيو اللي نديم بيقدم فيه للشغل، وهو صعب علشان فيه حفظ كتير والمفروض أن نديم حافظ زي اسمه وهو شاطر جدا في المحاماة، لكن محتاج مهارات للتواصل لأنه شخص واضح مش بيعرف يحور، وعدته أكتر من مرة علشان كنت بعطل لأني كان باين أني بفتكر الكلام وهو المفروض يكون حافظه كويس وكنت متوتر جدا وحاسس اني في انترفيو بجد.
وأضاف طه دسوقي: وفاة جميل مشهد صعب، واللي كان مخوفني من الدور ده أني بجسد حالة موجودة وفي ناس عندها توحد، ولذلك معنديش المساحة أني ارتجل او اختلق حاجة من دماغي، وكانت الفكرة إيه رد فعله تجاه الموت.
وتابع طه دسوقي: الحاجة اللي نفسي توصل للجمهور إن كلنا مختلفين مش بس نديم اللي مختلف، وكل الناس مختلفة، وكل واحد عنده طريقته وبنحاول نفهم بعض علشان الدنيا تمشي.
وعن التشابه بينه وبين شخصية نديم قال: المشترك بينا التردد وأني شخص روتيني لما بكون متعود على حاجة وتتغير بضايق، والحاجة المختلفة بينا أن نديم بيشرب شاي بلبن وأنا بشرب قهوة.
وعن علاقة نديم بـ رام الله في المسلسل قال: علاقتهم ببعض ملغبطة لأن نديم مش عارف إيه الحب أو اللي بيحس به تجاه رام الله ده معناه إيه، وبيسأل جميل صاحبه الوحيد، فكانت العلاقة ملغبطاه لأنه مش عارف ده إيه، ولو حب مش عارف يعبر عنه بطريقة الشخص العادي ومش فاهم اللي خارج منها إيه فكانت علاقة ملغبطة، ورام لله في المسلسل كانت أكتر حد قرب منه وكلمه بلغته ولذلك حصل بينهم هذه العلاقة.
واختتم طه دسوقي حديثه قائلًا: بشكر المخرج عبد العزيز النجار لأنه تعب معايا وقعدنا مع بعض واتكلمنا كتير في التحضير والمؤلف مهاب طارق، لأنه كاتب ورق حلو جدا والكاست غادة عادل وحسن أبو الروس ولينا إيهاب وعلي السبع وهاجر السراج.
