إنجي علاء تنفي هجومها على بيومي فؤاد: انتقدت التعامل مع الفن
نفت المؤلفة إنجي علاء، انتقادها للفنان بيومي فؤاد، بعد المنشور الذي كتبته بعد أزمة الفنان بيومي فؤاد ومحمد سلام.
وقالت إنجي علاء خلال لقائها مع القاهرة 24: اتكلمت عن الفن بشكل عام، لأن فيه كذا موقف حصل ورا بعضه، وأنا مش بنتقد أشخاص لأن عندي مبدأ أن أي شخص معرض إنه يغلط وإحنا بشر كلنا بنغلط.
وأضافت: انتقدت التعامل مع الفن، والفن له قيمة وهيبة ولازم نحترمها ولازم نحترم إننا بنقدم حاجة مؤثرة في المجتمع والشباب ومهمة، وما نقللش منها ولا نرخصها لأي سبب، وده كلام عام مش شخصي، حتى في شغلنا لو قصرت في شغلي أو أهملت هكون مش هكون مقدرة قيمة الفن، هكون بوصل للجمهور دراما مغلوطة.
أهم رسالة ترقيق مشاعر الناس
واستكملت إنجي علاء: الفن تسلية وترفيه ودايمًا بيوصل رسائل، ومش لازم تكون نصائح، وبالنسبة لي أهم رسالة إني أرقق مشاعر الناس، وده في حد ذاته رسالة وممكن في عمل كوميدي لايت جدا بتلاقي نفسك دمعتي ودي كلها رسايل.
وأكملت: الفن له هيبته واحترامه بكل أنواعه وعلينا نحترم الفن ونفسنا وفننا ونطور من نفسنا، ونقدم اللي الجمهور يستحقه لأن الجمهور يستحق، وأنا مش بحب أهمل في شغلي أو أشوف إهمال أو حد بينتقص من قيمة الفن ده مش صح.
وكانت كتبت إنجي علاء عبر حسابها الرسمي بموقع فيس بوك: أنت كفنان مبدع ربنا أنعم عليك بنعمة قدرها عظيم، لو محترمتهاش محدش هيحترمك، وهتبقى رخصت فنك ونفسك، ومن سمو الفن إنه مرآة لمشاعر المجتمع، والفنان الحقيقي بيكون مهموم بهموم الناس، حاسس بهم، بيعبر عنهم وعن الوجع اللي جواهم، وحتى وهو بيرفه عنهم بيقدر يوصل رسالة تفيدهم وتأثر فيهم، وهو بيرقق مشاعرهم، والفنان الحقيقي بيحترم مهنته، وبيحترم الموهبة اللي ربنا ادهاله، وبيحترم نفسه وعارف قيمة فنه، وأنا بريئة من العبث اللي بيحصل ده، الفن أرقى من كده بكتير.
