مشيرة إسماعيل: ارتدائي الحجاب سر بيني وبين ربنا.. وزمان كنا بنلبس بكيني وعريان علشان كنا صغيرين
علقت الفنانة مشيرة إسماعيل، على ارتدائها الحجاب منذ سنوات، ورأيها في ملابس الفنانات حاليًا.
وقالت مشيرة إسماعيل، في تصريحات لـ القاهرة 24: ارتدائي الحجاب سر بيني وبين ربنا، وزمان كنا بنطلع عريان والبكيني في التصوير، وكنا ساعات بنلبس عريان وساعات مقفول، لكن كان مقبول لأننا كنا صغرين، وفنانين دلوقتي صغيرين ومقبول منهم يلبسوا براحتهم، ومسيرهم في يوم من الأيام مش هيلبسوا عريان، وكل واحد حر في حياته، وطالما حاجات لايقة عليهم ومش مبتذلة فعادي.
وفي سياق آخر، تحدثت الفنانة مشيرة إسماعيل، عن سبب غيابها عن التمثيل منذ عام 2017، وقالت لـ القاهرة 24: اللي بيتعرض عليا دون المستوى، وكتير بيكتبوا إني اعتزلت، ومش حقيقي، لكن اللي في سني كله قاعد في بيته لأن مفيش حاجة تنفعنا، وأنا وجيلي واللي قبلي قاعدين في بيوتنا والأعمال مش في المستوى اللي نشتغله، وأنا مش بتاعة إني أكلم حد ودي حاجة خارجة عن إرادتي مين ممكن في مستوانا يكلم مخرج عشان يشغله؟ اللي بيجري على الدور ويعمل أي حاجة حر ما هو أي حاجة موجودة، لكن جيلنا اتعود على حاجة تانية.
أعمال مشيرة إسماعيل
يُشار إلى أن مشيرة إسماعيل من مواليد 26 سبتمبر 1950، بدأت مشوارها الفني بالمشاركة في السهرات التلفزيونية والفوازير، وشاركت في فوازير عمو فؤاد، التي كان يقدمها الفنان الراحل فؤاد المهندس، وحققت شهرة واسعة على مدار 5 سنوات، وبدأت العمل في السينما بعدما رشحها حسين كمال لتشارك في فيلم البوسطجي، عام 1968، وتوالت أعمالها وشاركت مع كبار النجوم، منها مشاركتها مع الزعيم عادل إمام في ثلاث أعمال وهي فيلم إحنا بتوع الأتوبيس عام 1979، مسلسل دموع في عيون وقحة عام 1980، كما قدمت معه بطولة مسرحية الواد سيد الشغال عام 1985.
