هتعمل اللي أقولك عليه ولا أقتل أبوك؟.. نص تحقيقات واقعة خطف طالب داخل سنتر بالبدرشين |خاص
حصل القاهرة 24 على نص التحقيقات في القضية التي حملت رقم 23953 لسنة 2023 في واقعة استدراج وخطف طالب وتقييده بالحبال وإجباره على توقيع إيصالات أمانة واحتجازه داخل سنتر تعليمي بالبدرشين.
استدراج وخطف طالب
واستمعت جهات التحقيق لأقوال المجني عليه الثاني، وجاءت: اللي حصل إني كنت باخد درس في سنتر اسمارت بتاع اكرامي اللى عندنا في ابوصير وبعد ما خلصت وانا خارج لقيت اكرامي بيقولي تعالى عاوزك فقولتله عاوز ايه فقالي انت عليك فلوس سنتر مدفعتهاش فقولتله لما بابا يقبض هجبهالك، فقالي تعالي قول لمس سها الكلام ده، قولتله ماشي وانا طالع معاه فوق لقيته حط حاجة في جمبي زي السكينة وقالي متعملش صوت وفضلت ماشي لحد ما طلعني فوق على السطوح وفوق خد مني البطاقة بتاعتي والموبايل والشنطة اللي فيها كتب الدروس وبعدين ظهر واحد بيقولوا عم عبده عرفت بعدها إنه عم إلى اسمه إكرامي واسمه الحقيقي عبد الواحد.
وأضاف: لقيت مس سها طلعت وشافت اللي حصل وقالتلي دي اخرتك ونزلت تاني وبعدين قالولي هتعمل اللي هنقولك عليه ولا نشيلك الليلة كلها فقولتلهم انا معرفش اي حاجة فاكرامي قالي هتقول اللي هنقولك عليه يا اما هنقتللك أبوك ونخطفه فرفضت فحطوني على سور السطح بتاع السنتر وقالولي هنرميك من فوق وهنقول حرامي كان بيسرق وبنجري وراه ووقع من فوق مات وبعدين قولتلهم انتوا عاوزني أقول ايه بالظبط فقالولي انك تقول ان الواد الثاني اللي هو خالد كان معاك وسرقتوا الحاجات في السنتر اللي هيا مراوح سقف وأبواب وشبابيك.
وتابع: قالي وانت هتبقي شاهد بس وبعدين لما لقيتهم كده قولتلهم حاضر هعمل اللي انتوا عاوزينه وراحوا كتفوني من ايدي ورجليا وقعدوا يضربوا فيا ويشتموني وبعدين لقيت خالد هاني جه مع واحد اسمه باسم وعزت وقعدوا كلهم يضربوا فيا وفي خالد وربطوه من رجليه وايديه وقعدوا يضربوا فيه عشان يقول إنه سرق بس معرفوش يطلعوا منه حاجة وبعد كده لقيتهم اتلموا عليه وكان معاهم ورق في أيديهم وبيقولوا امضي وابصم هنا وبعدين راح ابوه جه عند السنتر ولما لقوا ابوه جه وعيلة ابوه والناس اللي في الشارع بتتلم راحوا سابوني انا وخالد هاني وده كل اللي حصل.
وكانت محكمة جنايات الجيزة قضت بمعاقبة المتهمين بالسجن عامين لقيامهم باستدراج وخطف طالب وتقييده بالحبال داخل سنتر تعليمي، وإجباره على توقيع إيصالات أمانة وبراءة المتهمة الأخيرة.
