عمر عبد العزيز: أفاجأ بممثلين ثقال الظل بفيلم كوميدي.. وألوم على هنيدي ومحمد سعد
انتقد المخرج عمر عبد العزيز رئيس الاتحاد العام للنقابات الفنية، فناني الكوميديا، مشيرًا إلى أنه يفاجئ بممثلين ثقلاء ظل مفروضين على الساحة الفنية.
وقال عمر عبد العزيز في لقائه مع القاهرة 24: بقى لنا مدة مش لاقيين أفلام كوميدية جيدة لأننا نركز على اتنين تلاتة بيضحكوا، بشوف حاجة مريبة جدًا، وأول شيء في الممثل الكوميدي يكون دمه خفيف، ولكني بفاجأ بناس ثقلاء ظل ويقول لك ممثل كوميدي! طب إزاي؟!
وأضاف عمر عبد العزيز: فيه فنانين كوميديا محشورة بيسقولنا المعلقة في بقنا، الكوميديا بتكون كوميديا موقف ورق الأول، ومخرج يحول ده، وممثل أوجهه علشان يوظف الضحك، لكن ما ينفعش أجيب ممثل يقول كل اللي بيقوله في كل فيلم.
وتابع: نصيحة لفناني مسرح مصر، أنا بحبهم، لكن فيه فرق كبير بين المسرح والسينما، يعني في المسرح بتقول اللي إنت عاوزه وتضحك، ولو الضحك زاد بيوقف، في السينما مينفعش نعيد الإفيه، لكن المخرج بيتحكم في الإفيه كمخرج، واللي بشوفه حاجة تانية.
عمر عبد العزيز يكشف رأيه في محمد هنيدي
كما كشف عمر عبد العزيز رأيه في الفنان محمد هنيدي، قائلًا: هنيدي من النجوم المهمين وممثل كوميدي، لكن لازم أوظف سني، وده اللي بلوم فيه على محمد هنيدي، وكذلك محمد سعد ممثل جامد لكن التكرار في الكوميديا وحش، ولازم أعرف بعمل دور سني فيه كام، علشان كده فيه أفلام خالدة بدون كوميديانات، ومحدش ينكر إبداع رشدي أباظة في الزوجة 13، ومش لازم يكون فنان كوميدان صريح علشان يمثل عمل كوميدي، وأنا حولت محمود عبد العزيز إلى كوميديان في الشقة من حق الزوجة.
وأكمل: الكوميديا تعتمد على الذكاء ولا يمكن تضحكي من غير تفكير، بعكس التراجيدي، ولذلك الكوميديا قائمة على الذكاء والعقل، وأتمنى يدوروا على ورق كويس مع سيناريست كويس.
