زوجة مدرس الفيزياء في التحقيقات: لقيت بقعة دم على هدومه فغسلتها ومعرفش هو قتله ليه؟
يواصل القاهرة 24 نشر أقوال زوجة مدرس الفيزياء المتهم بقتل الشاب إيهاب أشرف بالدقهلية، والتي حوت تفاصيل جديدة في القضية.
ووجهت جهات التحقيق لزوجة مدرس الفيزياء المتهم بقتل شاب الدقهلية، نشأة العلاقة الزوجية فيما بينها وبين المتهم محمد عبد البديع عبد الواحد وقالت أنامتجوزة محمد من حوالي سنة ونصف تقريبًا، وخلفت منه طفل عنده سبع شهور، وفي أول الجواز الظروف مكانتش كويسة لحد من فترة الظروف بدأت تتحسن من الدروس لما بدأت الطلبة تزيد عنده في الدرس وهو مدرس فيزياء وكيمياء وبيعمله في الشهر حوالي عشرين ألف جنيه من الدروس وتجارة الموبايلات اللي هو قايلي عليها معرفش عنها حاجة.
وعن علم زوجة مدرس الفيزياء المتهم في جريمة المنصورة، عن قيام زوجها المتهم بالاستدانة بمبالغ مالية من بعض من أهله وذويه، قالت: لأ معرفش ان هو سالف فلوس من حد، اللي اعرفه ان هو كان بيلعب لعبة علي النت لعبة ( BET )، وأنا بحثت عنها علي النت وعرفت ان هي حرام ولما قلتله امسحها قالي ماشي وقام ماسحها، معرفش ان هو فضل يكمل لعب علي اللعبة انا لما قلتله امسحها علشان حرام قالي ماشي وقام ماسحها.
أما عن واقعة مقتل الشاب إيهاب أشرف، قالت زوجة مدرس الفيزياء في التحقيقات: أنا عرفت لما محمد لاقيته راجع من الدرس وبيقولي ان في طالب عنده اسمه إيهاب اتخطف، وهو كان متوتر شويه بس لاقيت علي البنطلون اللي كان لابسه بقعة دم، وانا سألته ايه الدم ده قالي ان كان في حادثة علي الطريق وان هو كان بيشيل مع الأهالي المصابين وهدومه اتوسخت دم بسبب كده، وهو أول لما جه قلع البنطلون وحط عليه مايه وانا غسلته في ساعتها علي طول، لحد ما بقعة الدم راحت من عليه، لأ انا ما توقعتش ان هو يعمل كده.
وتابعت زوجة مدرس الفيزياء في التحقيقات، أنها نمي الي علمها بوفاة المجني عليه إيهاب أشرف طالب الدقهلية، أنا عرفت تاني يوم لما في ظابط كلم محمد جوزي وهو نزلهم ولاقيته راجع البيت بيعيط وبيقول ان إيهاب أتقتل وانا قعدت اهديه، وهو كان عادي وكان بيدور مع أهلية إيهاب من ساعة لما اختفي لحد ما عرفنا ان هو اتقتل وكان بيروح المركز كل شوية لما بيطلبوه ومشكتش فيه ومتوقتعش ان هو يعمل كده، ومحمد جوزي مش متعود أن هو يشتال أي سلاح أيًا كان نوعه بس هو علي طول بيبقي معاه شنطة، والشنطة دي علي طول كان بيبقي فيها اللاب توب بتاعه واقلامه والمذكرات بتاعته ودراعات البلايستيشن، وهو كان معايا مقتنع بالعيشة بتاعتنا وكان معرفني ان هو مشغل فلوس في تجارة موبايلات والحمد لله الدخل بدأ يتحسن ومفيش أي حاجة، وهو مكنش بيقول أي حاجة عن خلافات مع اي حد واللي اعرفه ان محمد جوزي علاقته حلوة بكل الطلبة اللي عنده في الدرس، وانا عرفت زي باقي الناس ان هو اعترف علي نفسه ان هو اللي عمل كده، وهو الحمد لله معندوش أي أمراض، وهو كويس ومش بياخد أي أدوية، ولا بيشرب أي حاجة، وأنا معرفش هو عمل كده ليه وانا مكنتش متوقعة ان هو يعمل كده أصلًا.
