شقيق حلمي بكر: هتكفل ببنته لو أمها سابتها.. واللي عايز ياخد حاجة من الورث ياخدها
تحدث شقيق الموسيقار الراحل حلمي بكر، عن مصير ابنته ريهام من زوجته الأخيرة سماح القرشي، مؤكدًا أنه على أتم الاستعداد للتكفل بابنة شقيقه الراحل، بجانب الحديث عن أزمة الميراث.
وقال شقيق حلمي بكر في لقائه مع القاهرة 24، عن ابنة شقيقه الراحل: ناويين نحطها في عينينا دي لحمنا، وساعة ما أمها تستغنى عنها أنا موجود ومستعد أتحملها في كل حاجة بس تبقى معايا ومع أولادي وأحفادي، ومفيش مشاكل إحنا مبنعملش مشاكل، وكان في تواصل مع أرملة أخويا ودلوقتي معرفش ومش عارف هي عايزة تعمل إيه.
أما عن أزمة الميراث، فعلق شقيق حلمي بكر: كان زمان أهالينا بيقولوا يا وارث مين يورثك؟ مفيش حد بيورث، هو خد إيه؟ الملايين اللي كانت معاه راحت فين وهو نزل خد إيه معاه؟ إحنا بنتولد عريانين وبنتدفن عريانين، واللي عايز ياخد أي حاجة ياخد، إحنا مبنبصش لأي مادة.
شقيق حلمي بكر: كان خايف قبل وفاته.. وأرملته رفضت وضعه في ثلاجة
كما كشف شقيق حلمي بكر كواليس أيامه الأخيرة، قائلًا: هو في الأيام الأخيرة كان خايف من إيه دي فيها علامة استفهام، ومكنش خايف من الموت، الموت علينا حق، وأنا زورته قبل ما يموت بأيام وهو في مصر، وهو كان تعبان وعرضت عليه أنه ييجي معايا ورفض ولكن دي تحط عليها علامة استفهام، وأنا كراجل كبير أعرف إذا كان هو مستريح ولا تعبان، وهو مكنش مرتاح.
وأكد شقيق حلمي بكر، أن السيدة سماح القرشي، أرملة شقيقه رفضت وضع الراحل في ثلاجة حفظ الموتى حتى إتمام مراسم الجنازة والدفن، قائلًا: مات وروحنا له بعد 5 ساعات ولسة هيقعد كما حوالي 8 ساعات علشان يتدفن وكان لازم نحطه في ثلاجة، وده مش رأيي ده رأي الأطباء والناس اللي كانت متابعة الحالة ومستشار وزير الصحة، وزوجته كانت رافضة وضعه في الثلاجة ومش عارف إيه مبررها، أنا شخصيًا مش هعمل أي حاجة هي عايزة تعمل، إحنا أهل مسالمين وحلمي كان مسالم ويشهد عليه ربنا كل زوجاته.
