شقيق عروس المحلة: جوز أختي مهتم بزمايله الستات ومش بيصرف على بيته
كشفت التحقيقات في قضية مقتل عروس المحلة على يد زوجها، وجود خلافات بين الزوجين، منذ لحظة زواجها، وسابقة وقوع مشادات كلامية بينهما، ومشاجرات منذ زواجها عام 2022، حتى انتهت المشادة الأخيرة بمقتلها.
أقوال شقيق عروس المحلة
وحصل القاهرة 24 علي نص التحقيقات بالقضية وجاءت أقوال شقيق عروس المحلة المجني عليها كالآتي:-
س / وما معلوماتك بشأن واقعة وفاة المجني عليها روان محمد عروس المحلة؟
ج / اللي حصل إن أختي متزوجة أحمد عبد الرحمن ومقيمة معاه هنا في المحلة في منطقة الشعبية بقالها سنة وخمس شهور ومخلفة منه طفل عنده خمس شهور، والنهاردة حوالي لساعة الثانية عشر ظهرا والدي جاله اتصال هاتفي من ضباط المباحث هنا في المحلة، بيبلغه إن اختي ماتت مقتولة وفي حد ضاربها وان اتعمل محضر واتعرض على النيابة العامة ولازم نحضر امام النيابة فجينا على المحلة على طول عشان نتسأل في القضية.
س / وما معلوماتك بشان واقعة وفاة شقيقتك؟
ج / أنا لسة معرفش حاجة عن الموضوع ده غير ان أحمد جوز روان قتلها بسكينة والكلام ده عرفته من ابويا واحنا جايين في الطريق للمحلة مع خالتي، لأن أما أبويا جاله التليفون كلمت أحمد جوزها لقيت تليفونه مقفول وكلمت أبوه تليفونه مقفول وفي حد من المشرحة كلم ابويا قاله تعالوا استلموا الجثة فعرفنا من الشخص ده إنها ميتة بطعنه سكينة فخالتي سبقتنا على المشرحة وكلمتني قالتلي إن أهل جوزها محدش منهم هناك خالص، وإحنا جينا النيابة نتسئل ونروح بعدها نستلم الجثة عشان المباحث قالت لنا لازم تروحوا النيابة تتسئلوا، لأن اتعمل محضر واتحول على النيابة بس إحنا بنتهم أحمد جوز روان انه قتلها لان بينهم خلافات كثير من يوم ما اتجوزوا، وهي حكتلي على كل حاجة بينهم من خيانته ليها وضربها وبهدلتها لحد آخر مكالمة بينا امبارح قالتلي تعالي روحني بلقاس أنا وابني، وأنا قلتلها ميصحش خلي جوزك يجيبك ونقعد نتكلم معاه.
س / وما تفصيلات الخلافات التي بين شقيقتك عروس المحلة وبين زوجها الذي تتهمه بقتلها؟
ج / هما على طول في مشاكل بسبب أنه على طول في شغله ومبيروحش بيته إلا بالليل خالص، ومتصاحب على كل زمايله الستات في الشغل ومهتم بيهم زيادة عن اللزوم، ومش بيصرف كويس على ابنه ومعهوش يصرف على بيته كويس، وكنت بساعده من غير روان ما تعرف واحوله فلوس كاش يصرف بيها على بيته ده غير إنه بيضربها كل فترة وبيقل أدبه عليها، وعنده سلاح بندقية خرطوش عاينها في البيت تحت سرير ابنه الصغير كان هددها مرة بيها وكمان وهما أول جوازهم وهما في شهر العسل كانوا في المنشية في إسكندرية، وضربها في كل جسمها ومن كتر صويتها الناس اتلمت وحاشته عنها ووالدي راحلها إسكندرية لقاها مضروبة وكان رابطها في السرير ومبهدلها جدًا، وأبويا صالحهم على بعض وحل الموضوع وعلى كده لحد آخر سبع أيام فاتوا كل يوم تتصل تشتكي منه وعايزة تسيب البيت وآخر مشكلة بينهم مكلماني بالظبط بتقولي تعالي خدني أنا وابني، وأنا مش طايقة أعيش معاه قفلت معاه واتصلت بيه قلتله في إيه؟، قالي مش مستاهلة تيجي أنا هاخد إجازة يومين وأنا هجيبها وأجيلك بكرة، وأنا اتحايلت عليه يصالحها وقالي حاضر والله مصالحها ونيجي نقعد عندكم يومين.
