مين اللي خلق ربنا؟.. وعلي جمعة: محدش لأنه خارج الزمان
رد الدكتور علي جمعة، مفتي الديار المصرية الأسبق، وعضو هيئة كبار العلماء، على سؤال طفل نصه: مين اللي خلق ربنا؟
مين اللي خلق ربنا؟.. علي جمعة: محدش لأنه خارج الزمان
وقال علي جمعة، خلال برنامج نور الدين، مساء الخميس: في حد يقول لي هو ربنا خلقنا أومال مين اللي خلق ربنا؟ أرد عليه وأقول له محدش؛ لأنه خارج الزمان، مضيفا: لو كان حد خلقه كان فيه زمان، ويبقى في حد قبله وخلقه، بمعنى لو في تغير يبقى فيه زمان، حتى لو الزمان هذا مليارات السنين، فمقدرش أقول مين اللي خلق ربنا، مفيش حد خلق ربنا، مفيش حد بيعد.
ربنا عنده كام سنة؟
وتوجه طفل بسؤال إلى الدكتور علي جمعة، مفتي الديار المصرية السابق، نصه: هو ربنا عنده كام سنة؟
وقال الدكتور علي جمعة: ربنا موجود على طول.. محدش بيعد لأنه سبحانه خارج الدايرة، فلا بداية ولا نهاية له ومحدش يعرف يعد لأنه مفيش زمن.. عدم وجود الزمن يخلينا نقول مينفعش السؤال ده لأن الله مختلف عننا.. فحد يقول عمر ربنا قد ايه؟ نقول ليس له عمر، لماذا؟ لأنه ليس حوله زمن.
وأوضح أن هذه الدائرة أخبرنا الله سبحانه وتعالي أن على رأسها العرش، وهو أكبر مخلوق خلقه الله سبحانه وتعالي، فالعرش مثل السقف تحته الجنة التي يعطيها للمؤمنين الطيبين الذين فعلوا الخير، وتحته النار التي يهدد بها العصاه الظالمين المفسدين الذين قتلوا الناس وأخرجوهم من ديارهم، والذين اعتدوا على الأموال والأعراض.
طفلة: ربنا خلقنا ليه؟
وقال الدكتور علي جمعة: ربنا خلقنا وقال لنا، وما خلقت الجن والإنس إلا ليعبدون، خلق الملائكة والجن وخلقنا وخلق عوالم كتيرة زينا علشان نعبده، مضيفا: كل عالم من العوالم دول بيعبد ربنا بيطريقته، الملائكة لا يعصون الله أبدا، إحنا خلقنا وعندنا عقل واختيار، واسجد لنا ملائكة وقال لنا انتم لو استقمتكم هتكونوا أفضل من الملائكة وفي منا اللى بيستقيم ومنا من لا يستقيم.
طفلة: ليه مش بنشوف ربنا؟
فيما توجهت طفلة إلى الدكتور علي جمعة، مفتي الديار المصرية السابق، بسؤال حول ليه مش بنشوف ربنا؟
وقال الدكتور علي جمعة: ربنا خارج الدائرة، هل إحنا نقدر نشوف أمواج الردار، أو تيار الأشعة اللي بعمل بها حاجات في جسمنا، الإنسان بيشوف بعين والضوء وبينعكش على الحاجة، طيب فين الضوء اللي هينعكس على ربنا.
وتابع: الضوء لا ينفع يتسلط على أى حاجة، وربنا ليس مخلوق ومش ممكن يكون مخلوق، ربنا خارج الدائرة الكونية التي فيها كل المخلوقات، ويوم القيامة هنكون على طرف الدائرة وساعتها هنشوف ربنا بس إزاي منعرفش يبقى كل اللي علينا نعمل عمل صالح علشان نشوف ربنا.
لماذا خلق الله العرش؟
وخلال الحلقة، قال الدكتور علي جمعة، مفتي الديار المصرية السابق، إن الشريعة لم توضح المادة التي خلق الله منها العرش، لافتا إلى أن عرش الرحمن، يمكن أن يكون خلق من اللؤلؤ أو الذهب أو الجواهر أو الزمرد.
وتابع الدكتور علي جمعة، مفتي الديار المصرية السابق، خلال حلقة برنامج "نور الدين"، المذاع على قنوات الشركة المتحدة، اليوم الخميس: العرش حاجة عظيمة فخمة وكبيرة أوي، وتشعر بنوع من الأمن والخشوع جواك.
ورد الدكتور على جمعة، على سؤال طفلة أخرى، حول لماذا خلق الله العرش، قائلا: اتعمل لأن ربنا سبحانه وتعالى رسم الدنيا على وضع معين، وفيه عوالم عالم الأرض وحواليه مجرة ومجموعة ضخمة من الكواكب، والشمس بتلف والأرض بتلف، وكل ده منطلق فى الفضاء حوالين نجم اسمه فيجا، وكل دول بيلفوا حوالين العرش، والكون فيها حاجات بنشوفها بالعين، وفي حاجات لا نستطيع رؤيتها، ومنها الكون المرصود وده بنقدر نشوفه، والضوء فيه بيجرى فيه 300 ألف كيلو في الثانية، ويعني في ثانية تروح مرسي مطروح، شوف الكون المرصود ده كله 93 مليار سنة، والكون كله 575 مليار سنة، يعني لو قسمناهم يبقى شايفين سدس الكون، والباقي لم نره.
وأوضح: لما ربنا خلى الكون يلف خلاه يلف حول العرش، والعرش ربنا عمله مخلوق عظيم مبهر، وربنا قهره واستولى عليه يبقى نعرف إن الله القاهر فوق عباده ونقوم ساجدين لله.
