نجوى فؤاد: بقالي 6 أشهر بتعذب ومحدش بيسأل عليا ومليش معاش
أعربت الفنانة نجوى فؤاد، عن استيائها الشديد بسبب عدم اهتمام نقابة المهن التمثيلية بحالتها الصحية بعد تدهورها خلال الفترة الماضية، وقلة قيمة معاش النقابة، بجانب عدم سؤال زملائها الفنانين عليها خلال فترة مرضها.
وقالت نجوى فؤاد في تصريحاتها مع الإعلامية سهير جودة: مفيش حد من الفنانيين ولا النقيب سأل فيا، بقالي 6 أشهر بتعذب ومليش معاش علشان إحنا موظفين بالقطعة، مفيش أي حاجة للفنان خالص، الواحد ضيع عمره ببلاش.
وتابعت: دكتور أشرف زكي قالي المعاش أعتقد 600 جنيه، قولتلهم ده أنا بديهم للبواب، الرحمة من عند ربنا ولازم يدوا الفنانيين أكتر من اللي بياخدوه دلوقتي كتير، لأن إحنا خدنا ملاليم وهما بياخدوا ملايين، لازم يساعدوا الناس الغلابة اللي مش قادرة تجيب مضاد حيوي علشان تتعالج، لازم يبقى لينا حل.
تفاصيل الحالة الصحية لنجوى فؤاد
سبق وكشفت الفنانة نجوىة فؤاد، عن تفاصيل حالتها الصحية خلال تصريحاتها مع القاهرة 24، قائلة إنها تعاني من مشكلة في العمود الفقري، متابعة: مش عارفة أعمل إيه تعبت من الأدوية وكل حاجة، ولسه كنت عند الدكتور ومبقتش أقدر أمشي خالص.
وأردفت نجوى فؤاد: بتحرك بكرسي متحرك، وبمشى في البيت بعكاز، وأتمنى الناس تدعيلي ربنا يشفيني لأني تعبت، ولسة بعمل جلسات علاج طبيعي بسبب الانزلاق الغضروفي، وباخد حقن علشان أعود إلى حياتي الطبيعية.
