قولتله هجيبلك كلب عشان أطلب فدية.. اعترافات قاتل طفل مدينة نصر: قتلته عشان ميفضحنيش| خاص
كشفت التحقيقات في قضية مقتل الطفل إبراهيم، على يد حداد بسبب مروره بضائقة مالية، وخطفه للطفل لطلب فدية من والده لسداد ديونه بمنطقة مدينة نصر بالقاهرة.
قاتل طفل مدينة نصر
وباستجواب المتهم بقتل طفل مدينة نصر قال أمام جهات التحقيق: اللي حصل إن أنا كنت فاتح ورشة حدادة وكان حالتي المادية كويسة وكنت كسيب وبعدين بدأ الحديد يغلى والشغل يقل وظروفي المادية بقت وحشة وبدأت أشرب مخدرات وكنت بشرب حشيش كثير وبعدها ضربت بودر وأدمنته ومعرفتش أبطله وفلوسي كلها كانت رايحة عليه.
وأوضح المتهم بقتل طفل مدينة نصر أمام جهات التحقيق: أخدت قرض من البنك بـ 10 آلاف جنيه ومعرفتش أسدده وبعدها استلفت مبلغ 5 آلاف جنيه من واحد اسمه رشوان ومعرفتش أدفع الفلوس برضه وأنا كنت مأجر الشقة بتاعته اللي على السطح في عمارة ناجح.ع ومكنتش برضه بدفع الإيجار وكان كل شوية بيطالبني بالفلوس وأنا مكنتش عارف أعمل إيه فسبت الشقة وبعدين في العيد كلمته وقولتله إن أنا عايز ارجع الشقة ثاني بس يصبر عليا شوية وإني هدبر له الفلوس اللي هو عايزها مني فقالي مفيش مشكلة ارجع الشقة تاني.
وأضاف المتهم بقتل طفل مدينة نصر: اتقابلت مع رشوان ومحمد وقالولى هتجيب فلوس رشوان إمتى وكنت حاسس بضغط رهيب عليا ومش عارف أعمل إيه فقولتلهم أنا هخطف عيل صغير وهرجعلكم الفلوس اللي عليا فقالولى حد الله بينا وبين الكلام ده بس أنا قلت مفيش قدامي غير إني أخطف عيل صغير وأطلب فدية من أهله وبكده كل مشاكلي هتتحل.
واستكمل المتهم بقتل طفل مدينة نصر أقواله أمام جهات التحقيق قائلا: بعدها بكام يوم روحت اشترى علبة سجاير من سوبر ماركت عم سيد وكان إبراهيم ابنه هو اللي قاعد فيه لوحده ومعاه أخته وساعتها جه في بالي إن هو ده اللي هخطفه وفضلت واقف بره لحد ما خرج فندهتله وقلتله إنى عندي كلب صغير ومسافر البلد فقالي أنا عايز آخده قلتله هو عندي في البيت على السطح تعالى معايا لو عايزه وفعلًا صدقني.
وأوضح قاتل طفل مدينة نصر بالتحقيقات: الواد دخل قال لأمه أنه مروح البيت وجالي تاني وأخدته ومشينا في الشارع وطول ما أنا ماشي معاه عمال أفكر إن هو هيفضحني فقررت أنى أول ما نطلع البيت أموته عشان ميتعرفش مين اللى كان خاطفه وانى هكلم أبوه واخد منه 200 ألف جنيه على أساس إني هرجعله ابنه وبعد ما آخد الفلوس أهرب.
