نجوى فؤاد: قرايبي بيسألوا عليا عشان الورث.. ومش ندمانة على مشاهدي الجريئة
قالت الفنانة نجوى فؤاد، إنها غير نادمة على مشاهدها الجريئة، كما علقت على انتقادات هذه المشاهد أمام الأهرام، بجانب كشفها عن محاولة أقاربها التقرب منها في الفترة الأخيرة بسبب الميراث.
وقالت نجوى فؤاد في تصريحات تلفزيونية: أنا مش ندمانة على مشاهدي الجريئة ووقتها كان سني يسمح لها، إحنا جيل خربشنا كتير علشان نبقى نجوم، وجيل دلوقتي مبيتعبش وبياخدوا 10 مليون وإحنا خدنا 10 ملاليم، وأعلى أجر أخدته كان 8 آلاف جنيه، ومقدرش أعمل دور تلميذة بفيونكات وأنا عندي 70 سنة.
وتابعت نجوى فؤاد: ندمت أني دخلت الوسط الفني، وضحيت إن يكون فيه أسرة وأولاد وأحفاد، كان هيبقى عندي حاجات كتير أوي أغلى من دلوقتي.
نجوى فؤاد عن صورها الجريئة أمام الأهرامات: عملت كده علشان مصر
أما عن انتقادات صورها الجريئة أمام الأهرامات، فعلقت نجوى فؤاد: الانتقادات كانت ليا لأني بعرض اللبس العريان زيادة عن اللزوم اللي أضافوه لينا الروسيات والراقصات الجدد، واقترحت يتحط شيفون ويكون الممنوع المرغوب ويجذب النظر، والصورة كانت إعلان لوزارة السياحة علشان مصر، الناس ليها حق تنتقد، ولكن ميعرفوش أني عملت كده علشان مصر.
وأضافت نجوى فؤاد، أن هناك، عددًا من أفراد أسرتها يحاولون التقرب منها بسبب الميراث، قائلة: في بعض الأقارب بدأوا يسألوا عليا علشان فات من عمري كتير، ولكن لعبهم على شونة ومفيش ورث ياخدوه، وأنا عديت بأزمات صحية كتير ومسألوش عليا.
