لقاء الخميسي: بكلم أبويا المتوفى وبيرد عليا.. وطلبت من أحمد زكي حضن في الأسانسير ونزلت قبره
قالت الفنانة لقاء الخميسي، إنها تتحدث مع والدها المتوفى معربة عن اشتياقها الكبير له، وأكدت أنها دخلت قبر الفنان الراحل أحمد زكي خلال دفنه.
وأضافت لقاء الخميسي في تصريحات تليفزيونية: بكلم والدي وبيرد عليا، أنا بكلمه في الكتابة عندي كشاكيل بكتب فيها، أنا بعرف اكتب ومفروض كنت أبقى مؤلفة، وبيبعتلي رسايل في علامات حواليا لأني بركز جدًا في التفاصيل.
وأكملت لقاء الخميسي: نزلت قبر أحمد زكي عشان بحبه، وكنت حامل في ابني، ونزلت السلالم كلها وطلعوني، وزوجي كان ماسك النعش معاهم، وبحبه عشان بصدقه ومن أهم الناس.
وواصلت لقاء الخميسي: كنا صغيرين أنا وزميلي لؤي عمران، وقابلنا أحمد زكي في الأسانسير، قالي أنتي ممثلة من غير ما يشوف لي حاجة ولا كنت عملت حاجة، وقالي هتبقي موهوبة جدًا، وقال لزميلي بردو، وقلت له أنا بحبك ممكن أخد حضن، راح حاضني، وبعد وفاته مقدرتش اتفرج له على حاجة، وعمري ما نزلت القبر غير لأبويا.
لقاء الخميسي: أنا ممثلة من قبل خالد سليم وحقي أحط اسمي قبله
كما علقت الفنانة لقاء الخميسي على أزمتها مع الفنان خالد سليم، حول ترتيب الأسماء على التتر، قائلة: مسلسل أبواب الشك كان حقي أحط اسمي قبل خالد سليم، ومضيت من غير ما أعرف أن خالد سليم هو اللي رشحني، وخالد سليم نجم كبير لكن بشوفه مطرب ومغني جامد، لكن أنا أصلي ممثلة، والفرق بينه وبين تامر حسني أنه اتعمله أفلام كتير لسنين، والخناقة غريبة لأنه على مين يمين ومين شمال، وخالد عشرة ومتجوز صاحبتي.
