حاتم صلاح: أحمد مكي ساعدني في الكبير أوي وأعطانا مساحة كبيرة
تحدث الفنان حاتم صلاح عن تعاونه مع الفنان أحمد مكي في مسلسل الكبير للعام الثالث على التوالي، بتقديم شخصية نفادي التي حققت نجاحًا كبيرًا وأحبها الجمهور.
حاتم صلاح: ممكن يكون آخر موسم
وقال حاتم صلاح في حواره مع القاهرة 24: حاولنا نقدم حاجة لطيفة وعملنا مجهود أكبر السنة دي خاصة أنه ممكن يكون آخر موسم له، وحاولنا نطور الشخصية ونلعب على الحاجات اللي ما كانتش مستغلة السنين السابقة زي الشعر.
وعن التعاون مع أحمد مكي، قال: بعتبر نفسي صاحبه، واستفدت منه جدًا خاصة أنه أعطاني مساحة كبيرة جدًا وعنده روح الفريق، وممكن تلاقيه في مشهد واقف ساكت، علشان إحنا نقول، وفي وقت تاني العكس، بنتعامل كفريق، ومش شرط علشان بطل العمل هو اللي يقول كل حاجة، لكن مكي مدينا مساحة كبيرة جدا، ومكي بيتعامل كفرد من الفريق ممكن كلنا نفكر في جملة، علشان حد بيقول حاجة حلوة.
واستكمل: مسلسل الكبير ساعد في نجاحي بشكل كبير وخلاني موجود في الوسط الفني، وناس كتير بيكلموني في أدوار، لأن المسلسل صاحب أكبر قاعدة جماهيرية في الوطن العربي، علشان كده النجاح الأكبر ليا من خلاله.
وواصل: وفي النهاية كانوا عاملين 5 مواسم قبلنا، وكانوا مكسرين الدنيا، وإحنا نفسنا كنا من جمهورهم وفجأة بقينا معاهم وأبطال معاهم، وحاولنا نضيف للعمل علشان نكون قد المسؤولية، لأننا داخلين مع كوميدينات مصر ومكسرين الدنيا، وعاوزين نثبت نفسنا، وكلهم ساعدونا، ومكي وأحمد الجندي ليهم الفضل إننا نكون موجودين، ومش مجرد ناس بتسند، ولكن كأبطال.
