ميدو: إشراف حازم إمام على المنتخب مش شغلته.. واتحاد الكرة لا يصلح له سوى محمود طاهر والجنايني
أدلى أحمد حسام ميدو نجم الزمالك والكرة المصرية الأسبق بتصريحات نارية، عن اتحاد الكرة المصري والمنظومة الرياضية المصرية.
ميدو: إشراف حازم إمام على المنتخب مش شغلته
وقال ميدو في تصريحات تليفزيونية: “كنت معترض على إشراف حازم إمام على منتخب مصر؛ لأنها مش شغلته، هو عضو مجلس إدارة فـ مش شغلتي ولا أتفاوض ولا هحط عقود لمدرب ولا أشرف على المنتخب.. وأنا عمري ما هشرف على المنتخب لو أنا مكانه”.
وأضاف: “مفيش بني آدم قعد على كرسي اتحاد الكرة سيد قراره، وعمري ما هقعد على الكرسي بتاع اتحاد الكرة”.
وتابع ميدو تصريحاته: “الفساد أن الفيفا يجبرك على لجنة فض المنازعات ومتعملهاش عشان انت مش عاوز تشتغل مع مجدي عبد الغني.. وهناك عقود لـ لاعبين غلابة عند الأندية مخدوهاش”.
وزاد ميدو في تصريحاته: غياب العدل والتوفيق سبب في عدم صعود المنتخب لكأس العالم 2022 وسبب في الهزيمة على يد السنغال في نهائي كأس أمم إفريقيا.
وأكد: اتحاد الكرة لا يصلح له أي شخص في مصر سوى الجنايني أو محمود طاهر وبقول لأي حد بيحاول يبقا موجود من جديد وفشل قبل كدة بلاش احسن.. وطاهر أبو زيد عنده مشاكل مع الأهلي ومجلس إدارته وهيتحارب من أول يوم لو دخل اتحاد الكرة المصري.
وأشار: أحمد مجاهد راجل شاطر وحافظ شغله لكن أبو ريدة أعطى له حرية أنه يفعل كل شيء فأضعف باقي ترابيزة اتحاد الكرة حينها.
وشدّد ميدو: في مصر عمري ما هكون سيد قراري بنسبة 100%، وما يحميني أن لا يتم إسناد أي ملف لأي عضو ف اتحاد الكرة المصري، “ويبقا معايا راجل عنده خبرة بيحميني وبيصلّح العيوب ويضع روشتة إصلاح وأنا أضع الهيكلة في النهاية”.
وأضاف ميدو خلال تصريحاته: لا يوجد أي اختلاف مع أشخاص.. بس لما أجي ألاقي الدولي المصري الناس بيتعامل معاه باستهانة فـ كان لازم أطلع أتكلم وطلعت قولتلهم ازاي تنجحوا أن لازم يبقا فيه متحدث رسمي وعامر حسين يبقا رئيس اللجنة للمسابقات ومعاه شباب ينظموا المسابقة ويضمنوا العدالة لكل فرق ويبقا فيه مدير فني اجنبي ذو كفاءة ويعمل مشروع يعلن عنه بعد 3 شهور في مؤتمر صحفي.
واختتم تصريحاته: “مرتضى ومجلسه متقدرش تقول أنهم فشلوا لأنهم كسبوا بطولات في أصعب الظروف لكن مكنش ينفع يتخانق مع نفس الناس في نفس الوقت والناس اللي حواليه كانوا يقوموا بتوريطه في كل المشاكل اللي دخلها”.
