حورية فرغلي في أبرز تصريحاتها ببرنامج العرافة: هيثم أحمد زكي ضربني بسبب هاني عادل
حلت الفنانة حورية فرغلي، ضيفة في برنامج العرافة، الذي تقدمه الإعلامية بسمة وهبة، وكشفت من خلاله أسباب الخلاف السابق بينها وبين الفنان مصطفى شعبان، بجانب مواجهة شيخ العرافين على الهواء، بواقعة قال فيها إنها اشترت سيارة لمخرج وهو ما أغضب زوجته.
حورية فرغلي عن أزمتها مع مصطفى شعبان: سافرت ورجعت لقيت اسمي اتغير
وقالت الفنانة حورية فرغلي، إنّها تصالحت مع الفنان مصطفى شعبان، قائلة: كنا بنعمل مسلسل أمراض نسا مع بعض وكنا متفقين ولما سافرت ورجعت غيروا الاسم لدكتور أمراض نساء، ومعنى كده إن الدكتور يُنسب له العمل.
وأضافت حورية فرغلي: غضبت لأنني التقيت به من قبل في الحج واتفقنا على أن يكون الاسم هو أمراض نسا، وبعد ذلك وقعت وسافرت وجيت لقيت المسلسل اتغير اسمه بعد ما عجبني شخصيتي في المسلسل.
واستكملت: مكنش ينفع كده، اسم مصطفى شعبان بيبيع وأنا ببيع وعملت بوسترات على حسابي للمسلسل، لأن المفروض صورتي كانت تبقى معاه على الأفيش لكن لما رجعت من بره مصر لقيت الأفيشات كلها في مصر عليها صورته، فعملت لنفسي أفيش.
وأوضحت: أثناء تصوير مسلسل ساحرة الجنوب كان فيه حد من الكاست بيحتفل بعيد ميلاده، كنت فرحانة إني بشتغل معاه وبحترمه كمخرج اشتريت له عربية لانجلر لأن سيارته كانت بايظة خالص ومراته مرضيتش إنها تاخد العربية وهو مرضاش ياخدها.
وحول حديثها عن علاقتها بالفنان الراحل هيثم أحمد زكي، ردت حورية: مش هتكلم عن حد متوفي، لا اتخطبنا ولا اتجوزنا، مش عايزة أتكلم عن هيثم سيبوه مرتاح في قبره، أنا أعرفه منذ عام 2011، أما خطيبته فهي ظهرت جديد.
وفيما يخص سبب الخصام بينها وبين الراحل هيثم أحمد زكي، أوضحت: سبب خصامنا مع بعض هو مد إيده عليّ في لوكيشن مسلسل دوران شبرا والناس شاهدة، وكل ده عشان كنت بقول لأستاذ هاني عادل البقاء لله بسبب وفاة والدتك وبسأله عن سبب الوفاة وحكى لي، وأثناء ذلك شاهدنا هيثم وافتكر إني بتدلع.
وسبق أن كشفت الفنانة حورية فرغلي، سبب غيابها عن الوسط الفني خلال الفترة الماضية، حيث قالت في تصريحاتها لـ القاهرة 24 مؤخرًا: أنا مش غايبة بمزاجي وكنت بعمل عمليات واللي غبتهم 3 سنين بس، ومكنتش بتدلع والحمد لله اتعالجت وكفاية إني عالجت نفسي من جوه بعد اللي شوفته، ولو حد عاوز إني أشتغل معاه في عمل هما عارفين بيتي، لكن لو مش عاوزين خلاص براحتهم.
