فاروق فلوكس يرد على مها أحمد: يعني هيجيلي جلطة عشان عاكستك.. أنا مقدر ظروف ابنك
كشف الفنان فاروق فلوكس، تفاصيل إصابته بجلطة في القلب بسبب خلافه مع الفنانة مها أحمد، بجانب حقيقة تأجيله دفن والدته حتى يكمل عرض مسرحيته.
وقال فاروق فلوكس، خلال تصريحات تليفزيونية: جالي جلطة في القلب بسبب مها أحمد كنت شغال معاها في مسلسل، أنا مكنتش عارف أني بشتغل مع مارلين مونرو علشان يحصل لي كده في السن ده، هو أنا هروح أعاكسها وهي ترفضني ويجيلي جلطة؟ إيه المنطق الغريب ده؟
فاروق فلوكس يرد على مها أحمد
وتابع: المشهد اللي أنا انسحبت علشانه كانت في مكان وأنا في مكان، وربنا يسامحها وأنا مسامحها، وحجة البليد مسح التختة، أنا فعلًا جالي جلطة وعملت عملية في القلب، وهي علقت على جملة أنا بقولها وهو ده الموقف، ودي زي بناتي الصغيرين ومش نجمة كبيرة أوي، وهي سابت التمثيل شوية واشتغلت مذيعة، وبعدين سابت شغل المذيعة، وأنا مقدر ظروفها وظروف ابنها، وربنا يسامحها.
وعن حقيقة تأجيله دفن والدته، حتى يكمل عرض مسرحيته، فقال فاروق فلوكس: أنا مأجلتش دفن والدتي هي اتوفت الساعة 5 وتلت والدكتور جه وعمل اللازم وكان صعب تدفه الساعة 7، وكنت شغال مسرحية وقالوا لي ممكن نوقف وروحت اشتغلت وكانت من أصعب الليالي في حياتي، وأنا كنت عامل دور ابن أمه، وكانوا بيعلقوا عليا كتير أوي بعد المسرحية ويقولوا سلم على أمك، ويومها ماحدش منهم قال كلمة على أمي خالص، لأني سايب أمي ميتة في البيت.
وكشف فلوكس، عن أمنيته في الفن، قائلًا: طول عمري في عالم الفن كنت متمني دايمًا أن أي دور أعمله بنجاح، والنجومية مبتجيش كده لازم يكون في حب من الجماهير ونص جيد وتقمص جيد مني، مكنتش عايز أبقى نجم، ولكن الدور اللي أعمله ماحدش يعرف يعمله زيي.
