زعق لأمي وشتمها.. اعترافات أحد المتهمين بمحاولة إنهاء حياة شاب بالشرابية
شهدت منطقة الشرابية في 28 فبراير الماضي واقعة شروع في قتل المجني عليه محمد. خ، من المتهمين محمود وناصر، لقيامهما بسرقة هاتفه وحدوث مشاجرة آنذاك والتسديد له عدة طعنات متفرقة بجسده، وحصل القاهرة 24 على نص تحقيقات المتهمين في القضية التي حملت رقم 1145 لسنة 2024.
اعترافات أحد المتهمين بمحاولة إنهاء حياة شاب بالشرابية بسبب موبايل
وإلى نص التحقيقات
س: ما الذي حدث إذا وما هي ظروف ضبطك واحضارك؟
ج: اللي حصل أن أنا امبارح كنت راجع من الشغل على الساعة 3:00 العصر ونايم صحيت على صوت أمي وهي بتزعق مع محمد. خ، وسمعته وهو بيقول لأمي أنا مبردش على حريم هاتيلي الرجالة اللي عندك، وروحت قايم من على السرير جري وجبت الكذلك اللي كنت حاطه في الصالة عندنا، روحت واخده ونازل بيه جري لقيت اللي أسمه محمد.خ واقف عمال يشتم روحت ضاربة بالكذلك في وشه، وكان ناصر أخويا ساعتها كان جه من برة شايل سكينة في إيده وضرب محمد معايا، ولقينا محمد كان معاه كتر وقعد يلوش بيه واحنا فضلنا نضرب فيه لحد ما مسك في أخويا ناصر ووقع بيه على الأرض، وكان ساعتها ناصر بيضربه بالسكينة اللي كانت معاه ولقينا محمد كان بينزف دم والناس اتلمت وشالوه وجريوا بيه على المستشفى، وبعد كده روحت واخد بعضي ورايح على القسم مسلم نفسي للمباحث وهو ده كل اللى حصل.
س: متى وأين حدث ذلك تحديدا؟
ج: الكلام ده حصل في 28 فبراير 2024 الساعة 5 العصر قدام بيتنا.
س: ومن كان برفقتك آنذاك؟.
ج: كان معايا أخويا ناصر بس.
س: ما صلتك وعلاقتك بالمجني عليه محمد؟
ج: محمد مجرد جاري وما فيش أي علاقة بينا
س: وهل من خلافات فيما بينك وبين سالف الذكر؟
ج: لا ما فيش خلافات بينا.
س: وما هي كيفية تعديك على المجني عليه بالضرب؟
ج: لما سمعته بيشتم وسمعت صوت أمي روحت قائم من على السرير جري وأخدت الكذلك من الصالة وروحت نازل وأول ما شوفت محمد خالد روحت ضاربه بيه.
س: وما هي عدد الضربات التي كلتها لسالف الذكر؟ وأين استقرت؟
ج: ضربته كذا ضربه معرفش كام ضربه بالضبط والضربات كلها جت في جسمه كله.
س: وما هي الأداة التي استخدمتها في التعدي على المجني عليه؟
ج: كان معايا كذلك.
س: ولماذا تقتني مثل تلك الأداة؟
ج: عشان لو حصل مشكلة كبيرة ولا حاجة أقدر أدافع عن نفسي.
س: وما الذي حدث عقب ذلك؟
ج: لقيت أخويا ناصر جه وكان معاه سكينة صغيرة وقعد يضرب بيها محمد معايا.
س: وما تعليلك للإصابات الثابتة بالتذكرة الطبية الخاصة بالمجني عليه؟
ج: أيوة أنا وأخويا ناصر اللي ضربناه وعملنا فيه الإصابات دي.
س: هل لديك سوابق جنائية أخرى؟
ج: أيوة كان عندي قضية مخدرات أخدت فيها سنة ومخلصها.
