بعد حبيبة الشماع.. فتاة تتهم سائق شركة توصيل بالتسبب في صدمة لها: سأقاضيه عند عودتي لمصر
قالت حبيبة أسامة، التي تعرضت للإيذاء والسب والتهديد من سائق شركة توصيل المواطنين، إنها لم تتمكن من تحرير محضر ضد السائق، نظرًا لسفرها بالخارج، وخوفها من التأخر عن موعد الطائرة.
تفاصيل استغاثة فتاة من سائق أوبر
وأضافت حبيبة أسامة لـ القاهرة 24، أنها تنتوي تحرير محضر واتخاذ الإجرءات القانوينة تجاه السائق، فور عودتها لمصر، مشيرة إلى أنها تعرضت لصدمة نفسية مؤلمة بعدما تعرضت له من الإيذاء.
وعن الواقعة قالت حبيبة أسامة: حصل بينا خلاف على أجرة لمشوار مطار القاهرة، وأنا قولتله ممكن توصلني اللوكيشن القديم وهديك فلوسك قالي هو اللوكيشن كان فين، قولتله نزلني قدام المطار فوقف مكان فيه ميكروباصات، وقالي اللوكيشن هنا قولتله ده اللوكيشن مش قولتلي إنه قدام المطار؟، قام مشي تاني وقالي هنزلك حتة أقرب لقيته بيدخل في شوارع وده مش طريق المطار، والطيارة لسه عليها نص ساعة وبيقفلوا الكاونتر فقولتله ممكن تنزلني هنا عشان ألحق أطلب حد تاني، مكانش راضي لحد ما زعقتله.
وتابعت: وبعدين طلبت منه كذا مرة ينزلني، وقف في مكان كله عربيات شحن كبيرة، ونزلت وإديته 260 جنيه قعد يقولي ممكن تدفعيلي 500 ده تمن الرحلة، قولتله هو مش حضرتك نزلتني في اللوكيشن القديم اللي بتقول عليه يبقى ليه أدفع سعر الرحلة، قالي ماليش دعوة ده حقي لازم تدفعي، قولتله ممكن الشنطة عايزة ألحق الطيارة قالي مفيش شنطة غير لما تدفعي.
واختتمت: بعدين قعد يزعق وأنا عايزة حد يلحقني، بس كان كله عربيات ولو كنت بعدت كان ممكن ياخد الشنطة ويمشي بالعربية وماما واخواتي كانوا معايا على التيلفون وسامعين الخناقة، وهو عمال يزعق ورافض يديني شنطتي، قالولي إديله الفلوس وهنتصرف بعدين فاديته الفلوس وخدت الشنطة ومشي وفضلت واقفة في الطريق بالشنط لحد ما واحد تاني جالي.
