ياسر جلال ردًا على ميار الببلاوي: عايزاني أفرض وجودها.. وميصحش كده حجابك له احترامه
رد الفنان ياسر جلال، على عتاب الفنانة ميار الببلاوي له، بسبب عدم ترشيحها لمسلسل الفتوة، مؤكدًا أنه لا يتدخل في اختيارات مخرج العمل، كما أنه لم يتواصل نهائيًا مع الببلاوي منذ عام 1992، حتى أن طلبت منه الترشح في عمل.
وقال ياسر جلال، في لقائه مع الإعلامية فاطمة مصطفى، في برنامجها الراديو بيضحك عبر محطة الراديو 9090: طبعًا أنا مكنتش عايز أرد على الموضوع ده احترامًا للأستاذة ميار، وهي أخت عزيزة واشتغلت معاها سنة 1992 ومن هذا التاريخ لغاية وقتنا هذا أنا مشفتش ميار الببلاوي خالص، هي كلمتني في التليفون مشكورة بكل احترام، وقالتلي عايزة تمثل وقت تصوير مسلسل الفتوة، وأن المسلسل ده ينفع لها بالحجاب، وطبعًا مش هينفع لأنها هتعمل دور مين نجلاء بدر ولا مي عمر؟، دي أدوار متسكنة ووالله العظيم أنا راجل ببص في ورقتي، وأي نجم محترم مالوش أنه يتدخل في الكاست ده شغل المخرج، هي ميار علشان غايبة عن الساحة فترة واعتزلت فمتعرفش.
وأضاف ياسر جلال: أنا رأيي استشاري مع المخرج وعلاقتي بـ زميلاتي كلها حلوة، وميار نجمة معتزلة بقالها كتير، وعايزاني أفرض وجودها على الساحة، وأنا لما أرشح زميلة أخاف اتفهم غلط، أنا مصلحتي إيه معاها؟ أنا مبرشحش زميلات سيدات وده اختصاص المخرج.
وواصل: أنا مبقولش على مدير أعمالي لبيس ودي مش معيبة أنا بقول المساعد بتاعي أو مدير أعمالي، ولما أنا رديت عليها أول مرة ما أنا قادر أرد عليها تاني وأقولها محصلش نصيب، يعني معقولة أنا بالغباء ده؟ ميار ممكن يكون اختلط عليها الأمر وأنا بغير رقمي كتير وهي معهاش رقمي خالص.
واختتم: وأنا أشك ومش عايز أغلط وأقول أن حتة اللبيس دي من عندها، وميصحش يا ميار مكنش العشم لأني لا أذيتك في شيء ولا عملتلك حاجة، وده بكلامك أنا بحترمك ومازلت بحترمك، ومكنش يجب أنها تطلع وتقول كده وحجابك له احترامه، إيه الهدف من أنك تطلعي تقولي كده؟، لقمة إيه اللي كنا بنقسمها مع بعض؟ أنا مكنتش بقسم لقمة مع حد، أنا معرفش عنها حاجة من سنة 1992 وكنت بسمع أنها اعتزلت.
