تزامنًا مع أولى جلسات المحاكمة.. ننشر اعترافات سائق أوبر المتهم في قضية حبيبة الشماع| تحقيقات
يواصل القاهرة 24 نشر نص اعترافات سائق أوبر المتهم في قضية حبيبة الشماع فتاة الشروق، يأتي هذا بالتزامن مع انعقاد أولى جلسات محاكمة المتهم بالشروع في خطف المجني عليها حبيبة الشماع بطريق الإكراه، في القضية المعروفة إعلاميًا بـ فتاة الشروق.
أقوال سائق أوبر المتهم في قضية حبيبة الشماع فتاة الشروق
وجاءت أقوال المتهم محمود هاشم سائق أوبر خلال التحقيقات في قضية حبيبة الشماع، في بداية الواقعة، حينما كانت حبيبة مصابة بالمركز الطبي العالمي، وتم سؤاله فيما هو منسوب إليه من أنه متهم بالشروع في خطف المجني عليها حبيبة الشماع حال كونها أنثى، بالطريق العام حال استقلالها السيارة، وكان ذلك بطريق الاكراه إلا أن أثر جريمته قد خابت في أثرها لسبب لا دخل لإرادته به ألا وهو قرار المجني عليها وفتحها لباب السيارة وسقوطها أرضًا على النحو المبين بالتحقيقات، كما أنه متهم بالشروع في قتل المجني عليها محدثًا ما بها من إصابات واردة بالتقرير الطبي، وقال سائق أوبر أمام جهات التحقيق:
«اللي حصل إن أنا شغال سواق عند دكتور اسمه م.س، ساكن في التجمع الأول وكل يوم بروح بعربيتي لحد الفيلا عنده وأسيبها وأركب العربية بتاعته، وأروح معاه الشغل والمشاوير بتاعته وبعدين آخد عربيتي وأرجع بيعها على بيتي اللي موجود في أوسيم الجيزة، وبعدين وأنا رايح وراجع الشغل أشتغل على تطبيق أوبر آخد زبائن معايا في الطريق عشان خاطر أزود دخلي ويوم الأربعاء اللي فات الموافق 21 فبراير 2024، خرجت من بيتي الصبح فتحت أبلكيشن أوبر وأخدت بنت معايا كانت رايحة للتجمع وفعلا وصلتها وبعدين روحت للدكتور البيت وأخدته وروحت بيه على الشغل بتاعه في المعادي وبعدين روحت وصلته لمستشفى الجلاء عشان يزور واحد قريبة وسبته ورجعت مواصلات على بيته في مدينتي وأخدت عربيتي وفتحت أبلكيشن أوبر».
أقوال المتهم بمحاولة خطف حبيبة الشماع فتاة الشروق
أضاف سائق أوبر المتهم بمحاولة خطف حبيبة الشماع فتاة الشروق في التحقيقات: جالي طلب توصيل من بنت من التجمع الأول للرحاب وروحت أخدتها وإحنا ماشيين في الطريق لقيتها بتكلم حد وبتقوله أنا رايحة الرحاب عند بوابة 22 وبعدين لقيتها بتقولي وطي صوت الكاست عشان خاطر كنت مشغل إذاعة أون سبورت بتاعت الرياضة على ماتش في الدوري، وفعلا وطيت الصوت وبعدين الجو برد وقفلت الزجاج بتاع العربية وبعدين لقيت ريحة العربية وحشة عشان خاطر السجائر وريحة الكاوتش اللي لابسة في رجلي كانت وحشة فطلعت زجاجة برفان ورشيت على نفسي عشان خاطر الريحة وفجأة لقيت البنت اللي راكبة معايا فتحت باب العربية ونطت من العربية وهي ماشية على الطريق، وفضلت تتقلب على الطريق لحد ما ركنت على جنب وبعدين أنا مشيت بالعربية وبصيت عليها بعد ما وقفت قدام لقيتها اترمت على جنب الطريق ومفيش عربية خبطتها وأخدت بعضي وجريت لإني كنت خايف أقف والبنت يجرالها حاجة وأدخل أنا في مشكلة وبعدين وأنا ماشي لغيت الطلب بتاعها ورجعت على البيت وحكيت لمراتي وأختي باللي حصل وكنت خايف.
وأضاف سائق أوبر المتهم في واقعة حبيبة الشماع فتاة الشروق: تاني يوم كلمت الدكتور صاحب الشغل وقولتله إن أنا تعبان وعندي برد ومش هعرف آجي وأنا مكنتش تعبان، وعملت كدا عشان كنت خايف آجي وأتمسك وفعلا تاني يوم اللي هو الخميس لقيت في ضباط مباحث جم على بيتي وخدوني على قسم الشروق وحكتلهم اللي حصل وجبوني على هنا وهو دا كل اللي حصل.
وتم سؤاله المتهم عن قوله فيما هو منسوب إليه من أنه متهم بحيازة جوهر الحشيش المخدر بقصد التعاطي في غير الأحوال المصرح بها قانونا وعلى النحو المبين بالتحقيقات؟
أجاب: أيوة أنا بشرب حشيش بس تفاريح
س: ما قولك فيما هو منسوب اليك من أنك متهم بقيادة مركبة حال كونك واقع تحت تأثير مخدر وذلك على النحو المبين بالتحقيقات؟
ج الكلام دة محصلش
س ومتى وأين قمت بتعاطي تلك المواد المخدرة تحديدا؟
ج: انا آخر مرة شربت فيها كانت يوم الحادثة، لما رجعت بعدها البيت وكنت خايف من اللي حصل ومش عارف أعمل ايه، وكان معايا باقي سيجارة حشيش شربتها
س وما هي طبيعة تلك المواد المخدرة؟
ج كانت سيجارة حشيش
س وما هو مصدر تحصلك على تلك المواد المخدرة؟
ج: كنت يوم الأحد اللي قبل الواقعة جايب حتة بخمسين جنيه وشاريها من واحد معرفش بياناته بيقف في ميدان لبنان.
س وما مدى اعتيادك على تعاطي تلك المادة؟
ج أنا بشرب تفاريح يعنى الأسبوع اللي فات ده شربت يوم الجمعة مع أصحابي في فرح، ويوم الاثنين قبل الحادثة بيومين عدیت جیبت حشيش وشربت سيجارة، واتبقى سيجارة كمان من الحتة اللي أنا اشتريتها، شربتها بعد الحادثة اللي حصلت علشان أعصابي كانت مشدودة.
س وهل كنت تحت تأثير ذلك المخدر وقت الواقعة؟
ج لا أنا مكنتش شارب أي حاجة ساعتها
س ومن كان برفقتك وقت تعاطيك لتلك المواد المخدرة؟
ج أنا كنت لوحدى كل مرة بشرب فيها ما عدا اللي كانت في الفرح.
س وأين تحديدا كنت تتعاطى تلك المواد المخدرة؟
ج كنت بشرب فوق سطح البيت بتعانا دايما وأوقات لما بكون قاعد في فرح
س وهل يعلم أحد من ذويك بتعاطيك لتلك المواد المخدرة؟
ج: لا محدش من أهلي يعرف.
س وما مدى علم شركة أوبر مصر بتعاطيك لتلك المواد المخدرة؟
ج: لا هي شركة أوبر ما تعرفش.. في الشركة بنعمل تحليل اول ما بنبتدي نشتغل معاهم.
س: ومتى تم قبولك للتعيين بالشركة سالفة الذكر؟
ج: كنت شغال في أوبر في سنة 2019، وبعدين سبتهم واشتغلت سواق في شركة شبكات، وبعدين لما سبت الشغل ده رجعت لشركة أوبر في آخر 2021 أو أول 2022 مش فاكر بالظبط.
س وهل قمت بإجراء تحاليل لتلك المواد المخدرة قبل تعيينك بشركة أوبر مصر؟
ج: أيوة أنا اتحللي مرتين قبل ما اشتغل فيها مرة في سنة 2019 ومرة في آخر2021.
س وهل كان يتم ذلك التحليل بصفة دورية؟
ج لا هي بتم أول مرة عند التعيين.
س وماذا كانت نتيجة تلك التحاليل؟
ج: هي النتيجة في المرتين كانت سلبية.
س أنت متهم بحيازة جوهر الحشيش المخدر بقصد التعاطي في غير الأحوال المصرح بها قانونا وعلى النحو المبين
بالتحقيقات
ج أيوة أنا بشرب حشيش
س أنت متهم بقيادة مركبة حال كونك واقع تحت تأثير مخدر وذلك على النحو المبين بالتحقيقات
ج محصلش.
وبعد حدوث الواقعة وقفز حبيبة الشماع، من السيارة بطريق السويس قام سائق أوبر المتهم بإخطار الشركة وأخبارهم عما حدث:-
أوضحت شركة أوبر تواصل المتهم في واقعة حبيبة الشماع فتاة الشروق مع الشركة عقب حدوث الواقعة، حيث أوضح لهم السائق بالتفصيل، قائلا: البنت (حبيبة الشماع) يا فندم نطت من العربية وهي ماشية مرة واحدة كده، ما أعرفش ليه، أنا كان ريحة عربيتي وحشة مطرح السجاير والكاوتش رشيت رشة معطر عليا، أنا على وشي ما أعرفش إزاي هي نطت من العربية، وقفت لحد أما اطمنت إن هي تمام وأخذت بعضي ومشيت، خفت لتلبسني مصيبة.
أكمل سائق أوبر المتهم في قضية حبيبة الشماع فتاة الشروق في إخطاره لشركة أوبر: وأنا راجل شغال موظف في النهار وآخر النهار بطلع بالعربية، عندي بيت وعيال عايز أربيهم، خفت لا يحصل مصيبة وخفت من الموقف أول مرة يحصل الموقف ده، ما أعرفش في إيه يا فندم حد يطمني يا فندم لا حول ولا قوة الا بالله العلي العظيم، طمني عليها يا فندم إيه بخير ولا إيه طب أنا إيه المفروض أعمله وأروح فين ولا آجي منين ولا أعمل إيه حد يكلمني ويفهمني.
وأضاف سائق أوبر المتهم في واقعة حبيبة الشماع فتاة الشروق: لقيت الباب اتفتح ونطت من العربية كان المفروض أنا أعمل إيه؟ أنا ما أعرفش جالي حالة خوف ورهاب، أول مرة يحصل الموقف ده يا فندم، أنا عايز أطمئن حد يتواصل معايا يقول لي إيه العمل أروح أسلم نفسي ولا أعمل إيه؟ أسلم نفسي للحكومة ولا أعمل إيه، هي نطت من العربية ليه؟ أنا راجل عندي بيت وعيال وخائف على الشغل وخائف على بيتي، شغال شغلانة تانية بالنهار غير الشغلانه دية، وبقى لي كم سنة في أوبر عمر ما حصل حاجة زي كده، إزاي يحصل حاجة زي كده يا فندم حد يطمنا يا فندم أنا قاعد قلقان من ساعة الحوار.
واختتم سائق أوبر: حد يطمني يا فندم يطمني إيه عامله إيه، أنا وقفت لقيت الناس اتلمت العربيات بدأت تقف واطمنت، وأخذت بعضي ومشيت، يا فندم أنا راجل عندي بيت وعيال وعندي شغلي بالنهار، لو حصل أي مشكلة فيها مصيبة بالنسبة لي أنا ما عملتش حاجة أنا رشيت برفان على نفسي بعد ما رشيت برفان نطت من العربية طب ليه ده أنا راشش على نفسي يا فندم حد يطمنا يا فندم عليها، يا فندم أنا عندي بيت وعيال عايز أعرف إيه المشكلة، وأنا بقى لي سنتين معاكم وأكثر، كمان عمرنا ما عملنا حاجة غلط.
