رانيا يوسف: عزمت جوهرة على مهرجان أسوان بغرض الدعاية لمصر.. ولو الراجل معاه حق هنصفه
تحدثت الفنانة رانيا يوسف، عن مشاركتها في لجنة التحكيم بمهرجان أسوان الدولي لأفلام المرأة، مشيرةً إلى أنها تعمل مع جميع أنواع المخرجين، باختلاف أنواعهم.
وقالت رانيا يوسف، خلال لقائها مع القاهرة 24: شوفت فيلم رحلة 404 وفاضلي أفلام هشوفها عشان أعرف أحكم على الأفلام كلها، وأنا مش لوحدي وهتناقش مع زملائي في لجنة التحكيم عشان نعرف نحكم على الأفلام.
وتابعت رانيا يوسف متحدثة عن أعمالها الفنية، قائلة: مكنش المفروض إني هشارك في رمضان خالص، لأن مسلسلين جريمة منتصف الليل وبقينا اتنين كان المفروض إنهم خارج رمضان، ولكن اللي حصل إن دخل بقينا اتنين في الآخر دخول مفاجئ وعمل شغل كويس الحمد لله.
وأضافت رانيا يوسف: بشتغل مع كل المخرجين ولكن في مخرجين بشتغل معاهم بيركزوا عليّ من برا بس، وعايز اسم وست شكلها لطيف، مش عايز يشتغل على الدور نفسه، وعلى الجانب الآخر فيه مخرج بيشتغل معايا على الدور نفسه.
وكشفت رانيا يوسف عن موقفها من ترأس مهرجان مخصص للمرأة، وقالت: رئيسة مهرجان للمرأة دي مسؤولية كبيرة أوي مقدرش عليها، لكن لما بيبقى فيه حاجة تقدّر المرأة هكون معاها جدا لأني مرأة ومعايا بنتين، ولو الراجل معاه حق هنصفه.
رانيا يوسف: عزمت جوهرة على مهرجان أسوان للدعاية لـ مصر
واختتمت رانيا يوسف حديثها، مشيرة إلى إنها من عزمت الراقصة جوهرة لـ زيارة أسوان، حتى تكون دعاية قوية لـ مصر، وقالت: قلت لـ جوهرة أنا عازماكي تتفرجي على أسوان لأنها كان نفسها تشوفها، وده نوع من الدعاية لـ بلدي لأنها هتنزل الصور عندها وهتعمل دعايا كويسة لـ مصر عندها في روسيا، فدي حاجة بفيد بيها بلدي.
