زوج بدرية طلبة: في البيت غير الشاشة.. وبنتي متأسسة ومش محتاج أوصيها على جوزها
أعرب المؤلف مصطفى سالم، زوج الفنانة بدرية طلبة، عن سعادته الكبيرة بزواج ابنتهما سلمى، حيث يحتفلان بزفافها حاليًا في أحد فنادق القاهرة.
وقال زوج بدرية طلبة في لقائه مع القاهرة 24، خلال حفل زفاف ابنتهما سلمى: أنا عايز مجلدات علشان أتكلم عن بدرية، هي الحنية والرقة وهي على الشاشة غير البيت خالص، هي عاقلة في البيت، هي إنسانة جميلة وربنا يخليها لينا.
وأضاف زوج بدرية طلبة: أنا اتجوزت بدرية وهي عندها 18 سنة، شوفتها على المسرح وقولت مش هسيب البنت دي، وبدرية بالنسبة ليا حاجة كبيرة أوي هي مش حاسة بيها، كل سنة وأنتِ طيبة يا أم العروسة، وسلمى مش محتاجة نصيحة وهي متأسسة.
بدرية طلبة
كما أعربت الفنانة بدرية طلبة عن حبها الكبير لزوجها المؤلف مصطفى سالم، قائلة: مصطفى جوزي هو اللي مربيني ومعلمني المسرح وساندني طول عمره.
وأضافت بدرية طلبة: بقول لبنتي خلي بالك من جوزك ومفيش حاجة اسمها آخد شنطة هدومي وأروح عند أمي، الكلام ده بقى قديم، وأي مشكلة في الآخر بتنتهي، إحنا ناس مبتحبش مشاكل وبنتأنّى في مين اللي جاي لـ بنتنا.
وأردفت الفنانة بدرية: أنا أم محمد وأم أزواج بناتي مش حما، وبقول لجوزها دايمًا خلي بالك من بنتي وحطها في عينك، وحسيت إن كان ورايا مهمة وخلصتها النهاردة.
زفاف ابنة بدرية طلبة
وحضر حفل زفاف ابنة الفنانة بدرية طلبة العديد من نجوم الوسط الفني، وأبرزهم الفنانة سوسن بدر، منال سلامة، ميرهان حسين، الإعلامية بوسي شلبي، وغيرهم من النجوم.
