ياسمين عبد العزيز تكشف إمكانية زواجها بعد طلاقها من أحمد العوضي
كشفت الفنانة ياسمين عبد العزيز، إمكانية زواجها مرة أخرى بعد طلاقها من الفنان أحمد العوضي، بجانب الكشف عن تفاصيل طلاقهما.
وأوضحت ياسمين عبد العزيز، خلال حوارها مع الإعلامية إسعاد يونس، في برنامج صاحبة السعادة: أنا طول عمري متجوزة وعمري ما كنت سينجل، واللي طول عمره متجوز ده ميعرفش يبقى لوحده، من وأنا عندي 18 سنة متجوزة وبعد ما اتطلقت اتجوزت أحمد العوضي.
وتابعت ياسمين عبد العزيز: أنا حبيبة معرفش أبقى لوحدي، بس أنا أعمل إيه في قلبي دلوقتي؟ أي حاجة من ربنا خير، ربنا مبيعملش حاجة وحشة إحنا البني آدمين اللي مؤذيين، وربنا مبيعملش إلا كل خير، وأنا راضية.
ياسمين عبد العزيز تكشف تفاصيل طلاقها من أحمد العوضي
كما كشفت الفنانة ياسمين عبد العزيز، تفاصيل طلاقها من الفنان أحمد العوضي، قائلة: أقسم بالله سبب الطلاق مش خيانة، وفيه ناس مؤذية كتير بقالهم سنين بيأذوني وربنا يجبلي حقي، وأكيد لو خيانة أنا مش هسكت، والجمهور الحقيقي اللي بيحبنا بيحبنا مع بعض، فيه ناس قلبها أسود وحقودة مبيحبوش يشوفوا اتنين بيحبوا بعض ميعرفوش يعني إيه حب.
ياسمين عبد العزيز تبكي أثناء حديثها عن أحمد العوضي
وأضافت ياسمين عبد العزيز باكية: أكيد كان فيه مشاكل قبل الطلاق، وأنا مش بحب أحمد أنا بعشقه، أنا لما حبيت أحمد اكتشفت إني مكنتش بحب قبل كده، وإن أحمد هو أول حب في حياتي.
واستكملت ياسمين عبد العزيز: أنا كنت فاكرة إن قبل كده ده حب ولكن هو مش كده، أحمد الحب الحقيقي، أنا عن نفسي عملت استخارة وعمرة واللي ربنا رايده يكون، وعارفة إنه بيحبني وهو عارف إني بحبه.
حقيقة لقاء ياسمين عبد العزيز وأحمد العوضي في سحور القاهرة 24
وأكدت ياسمين عبد العزيز، أنها لم تلتقي بطليقها الفنان أحمد العوضي، في سحور موقع القاهرة 24، قائلة: قعدوا يقولوا انتوا في السحور شوفتوا بعض كل ده متركب أنا وأحمد مشوفناش بعض في السحور، هو كان موجود في وقت وأنا موجودة في وقت مختلف، يا جماعة ارحمونا بجد، هيستفيدوا إيه إنهم يوقعوا بينا؟.
وأردفت ياسمين عبد العزيز: كمية كلام بيقتال كذب، وناس كتير مصدقة إن أنا وأحمد شوفنا بعض وإني بتنهد، أنا التنهيدة دي عندي من ساعة ما اتطلقت، وحاسة إن فيه حاجة وجعاني في قلبي، ومش عارفة لو شوفته ممكن يحصل إيه.
واستطردت ياسمين عبد العزيز: أنا طول الوقت بهرب، بفتح الفيسبوك ألاقينا حاضنين بعض، أفتح التيك توك ألاقيهم عاملين لينا فيديوهات، يا جماعة ارحموني الحاجات دي بتوجع وبفكر في اللي فات خاصة إني بحبه.
