خبتها في كيس زبالة.. تامر عبدالمنعم يكشف تفاصيل سرقة مقتنيات شقته بالدقي
كشف الفنان تامر عبد المنعم، تفاصيل سرقته شقته بالدقي، على يد الخادمة التي تعمل معه، مؤكدًا أن المسروقات تُقدر بمبلغ كبير، كما أنه حاول حل الأمر بشكل ودي قبل التقدم ببلاغ.
وقال تامر عبد المنعم، في تصريحات خاصة لـ القاهرة 24: عندنا شغالة في البيت نازلة إجازة، فهي كانت نازلة وعايزة تاخد معاها كيس الزبالة وزوجتي كانت لوحدها في البيت، وقالتلها البواب بياخدها، البنت أصرت إنها تاخد الكيس ومراتي أصرت إنها متاخدهوش، وبعد ما مشيت من غير الكيس فوجئنا أنها كانت مخبية مقتنيات مهمة.
وواصل: للأسف الشديد وحظها العاثر يعني إن مراتي عرفت الموضوع، ولما دورنا لاقينا حاجات تانية مسروقة ومش موجودة، في منهم ساعتين غاليين كارتتيه وروليكس، وخواتم ألماظ لـ زوجتي، وموبايل غالي جدًا وحاجات كتير اللي قدرنا نكتشفه إلى الآن.
تامر عبد المنعم: حاولت أحل الموضوع بشكل ودي
وأضاف تامر عبد المنعم: كلموها من المكتب إنها تيجي بشكل ودي لأن لو بلغت سرقة مش هعرف اتنازل بعد كدة، توجهت بعد كده لقسم شرطة الدقي اللي أنا تابع له، والحقيقة الناس مشكورة بداية من مساعد أول وزير الداخلية اللواء هشام أبو النصر مدير أمن الجيزة، ورئيس قطاع شمال اللواء إيهاب خلاف، ورئيس مباحث عمرو فاروق، ومفتش المباحث مصطفى بيه خليل، والضباط.
واستكمل عبد المنعم: أنا كنت في غاية السعادة أنهم وقفوا معانا بهذا الشكل، وعليه أخذنا الإجراء القانوني وفي انتظار التحقيقات، وإلى الآن جارٍ البحث ولسة مش عارفة حاجة، أنا قدمت البلاغ ومنتظر أن حد يكلمني، وأنا كلي ثقة وعلى يقين أن وزارة الداخلية المصرية هتقدر تحل الموضوع.
واختتم تامر عبد المنعم: المقتنيات بفلوس كتير مش حاجة قليلة، بنتكلم في رقم كبير، ربنا يستر ويرجعوا ورجالتنا في الداخلية يستطيعوا إنهم يضبطوا هؤلاء.
