عمر كمال: علي ماهر موقفش قدام انتقالي للأهلي.. وقالي أنا أول واحد هوديك هناك
كشف عمر كمال عبد الواحد، نجم فريق الكرة الأول بالنادي الأهلي، كواليس انتقاله إلى الفريق الأحمر.
تصريحات عمر كمال عبد الواحد
وقال عمر كمال في تصريحات تليفزيونية: لقب الجوكر بخاف منه وتقيل على قلبي، لأني بحب أحمد فتحي، وكانوا بيسموه الجوكر ولسه لحد دلوقتي.. وإن حد يلقبني بنفس اللقب ييديني مسؤولية، ومبحبش تتقالي لأنها حمل عليا وشرف ليا وربنا يقدرني وأبقى قدها.
وواصل: لعبت للأهلي وكنت في مدرسة الكورة مع الهولندي كورفر.. ثم جاء كابتن محمد السيد في البراعم استلمني.. ولعبت حتى سن 13 واستغنوا عني عشان جسمي ضعيف.
وأضاف: كنت بعيط وأنا ماشي ووالدي قالي هوديك نادي تاني.. بس أنا قولتله لا بكرة الأهلي هيدوني فلوس، ووالدي متخيلش الكلمة دي وقالي إن شاء الله هتكمل وتروح الأهلي.. وبكرة كل اللاعيبة دول مش هيلعبوا فريق أول إلا أنت، وساعتها كان معايا شادي حسين، وكمان والدي قالي ربنا هيكرمك وهتفتكر الكلام دا.
وأردف عمر كمال: انتقلت إلى نادي مدينة نصر والأهلي كان بيعمل آخر كل سنة دورة ودية دولية، وبالصدفة شوفتهم بيلاعبوا فريق اتحاد الشرطة، فـ قولتلهم كلمولي المدرب عشان ألعب مع اتحاد الشرطة.. ورحت اختبرت هناك مع الكابتن إبراهيم يوسف وإسماعيل يوسف.. وأنا بختبر قالولي هات ولي أمرك فـ قولتله أبويا مش موجود عشان مش عاوزهم يعرفوا إن أبويا كمال عبد الواحد، وبعدين قالي هات أي حد من ولي أمرك فـ مشيت، وجيت تاني يوم وقالي فين والدك.. قولتله مش موجود تاني، فـ قالي هات رقمه وبعدين كلمه، واتفاجئ ووالدي قاله عمر لاغيني في موضوع الكورة.
واستكمل عمر كمال خلال تصريحاته: كمال عبد الواحد صديقي وليس والدي.. وأستشيره في كل مواقف حياتي قبل أي قرار ونتناقش.. لكن البركة في والدتي إذا قالت نعم أو لأ سأفعل ما تقوله.. ودعائها الدائم لي يكون ربنا يعملك الصالح.. وعمري ما استشرت والدي وكان قراره مش صائب،حتى لو هقابل أي عواقب لكن الموضوع يكون كالبراق.
وأكد خلال تصريحاته: علاقتي ب علي ماهر كبيرة، وآخذ رأيه في كل شيء وكان يقول لي أنت هتروح الأهلي، وعمره ما وقف ضد انتقالي للأهلي بس مشكلته كانت في الوقت اللي همشي فيه، لأننا كنا بنلعب في نصف نهائي الكونفيدرالية ولو رحت الأهلي مش هتلعب إفريقيا، هتلعب في الدوري بس، وربنا يكرمك وأول السنة الجاية أنا أول واحد هوديك الأهلي.
واختتم عمر كمال تصريحاته: عندما ذهبت للمصري كان الأمر ضغطًا عليّ بسبب الغربة.. وكانت فترة جيدة بالنسبة لي.
