مخرجا فيلم رفعت عيني للسما: كنا بنزور بطلات الفيلم شهريا لمدة 4 سنوات.. ورصدنا مراحل حياتهن |فيديو
كشف مخرجا فيلم رفعت عيني للسما، المخرج أيمن الأمير والمخرجة ندى رياض، الصعوبات التي واجهتهم أثناء تصوير العمل.
وقالت المخرجة ندى رياض خلال حوارها مع القاهرة 24: من الصعوبات اللي واجهناها وقت تصوير الفيلم، فكرة أننا محتاجين نقضي وقت طويل مع البنات، عشان نبني علاقة قوية بينا وبينهم وأهاليهم، علاقة فيها ثقة وتشارك.
واستكمل أيمن الأمير: ومن أول ما بدأنا وأحنا عارفين أن الفيلم ده مش هيتصور في أسبوع ولا اتنين، هو هيتصور في سنين، عشان لازم نشوف البنات وهما بيمروا بمرحلة التحول من الطفولة والمراهقة للنضج.
وتابع: وكنا بنزور البنات في المنيا مرة كل شهر على مدار الأربع سنين، وكان في كرم ضخم من أهل البنات وأهل القرية في المنيا.
مخرجا رفعت عيني للسما يتحدثان عن فوز الفيلم بمهرجان كان
وسبق وتحدث المخرجان عن تفاصيل حصول فيلمهما على جائزة العين الذهبية بمهرجان كان، حيث قالت ندى رياض: إحنا مكناش متوقعين خالص، وكان في 22 فيلم متقدم للمسابقة للفوز بالعين الذهبية، وفي منهم أفلام لمخرجين كبار جدًا، أكيد مكنش يخطر على بالنا إن إحنا يبقى عندنا فرصة، بس في الحقيقة إن البنات بطلات الفيلم كانوا متأكدين تمامًا إننا هناخد الجائزة.
فيلم رفعت عيني للسما
وتدور أحداث فيلم رفعت عيني للسما، حول مجموعة من الفتيات اللاتي يقررن تأسيس فرقة مسرحية وعرض مسرحياتهن المستوحاة من الفلكلور الشعبي الصعيدي، بشوارع قريتهن الصغيرة لتسليط الضوء على القضايا التي تؤرقهن كالزواج المبكر والعنف الأسري وتعليم الفتيات.
