سائق أوبر في واقعة الفنانة هلا السعيد: نزلت أعمل حمام ماجتش جنبها
يستكمل القاهرة 24، نشر نص تحقيقات المتهم سائق أوبر في قضية اتهام الفنانة هلا السعيد له بالتحرش بها التي حملت رقم 1040 لسنة 2024 جنح ثان الشيخ زايد، رقم الحصر من المجني عليها هلا السعيد وتعمل ممثلة.
سائق أوبر في واقعة الفنانة هلا السعيد
وحصل القاهرة 24 على نص تحقيقات المتهم في واقعة التحرش بالفنانة هلا السعيد وجاءت أقواله كالآتي:
اللي حصل إن أنا شغال سواق أوبر وامبارح يوم 22/5/2024 حوالي الساعة 11:30 صباحًا جالي طلب على تطبيق أوبر من استاذة هلا علشان أخدها من بفرلي هيلز في زايد وأوصلها لمدينتي وفعلا روحتلها وهي ركبت معايا وأول ما طلعت على طريق الضبعة لقيت لعربية شطبت مني غاز وأنا عندي في العربية مشكلة في طرمبة البنزين فرحت مهدي وواقف على جنب علشان طرمبة البنزين تبرد شوية علشان متعطلش مننا وساعتها أنا استأذنت أستاذة هالة وهي قالتلى تمام.
وتابع المتهم أقواله: وأنا بمجرد ما وقفت قلت عقبال ما العربية تبرد أنزل أعمل حمام في الشارع علشان أنا كنت محصور علشان أنا باخد أدوية زي ما قلت لحضرتك علشان التليف العضلي اللي عندي وأنا سعتها اتكسفت إني نازل أعمل حمام رحت نازل من العربية وروحت فاتح شنطة العربية ووقفت وراها علشان أداري فيها وأستاذة هالة متشوفنيش.
وأردف المتهم: وأول ما فتحت حزام البطلون لاقيتها نازلة بتجري من العربية وعماله تصوت وتشاور للعربيات اللي ماشية في الشارع وأنا سعتها قلتلها في إيه، أنا مش هعملك حاجة وروحت في ساعتها قافل حزام بنطلوني وحاولت أهديها بس معرفتش بس أنا سعادتك كنت محصور جامد روحت سیبها وروحت بعيد ورا العربية وفاكك بنطلوني وعملت حمام في الشارع وبعد ما خلصت هي كانت لسه واقفة ومحدش كان راضي يقفلها ففضلت أهدى فيها وأقولها تعالى اركبي متخفيش أنا مش هعملك حاجة بس هي مرضيتش تركب معايا.
وتابع المتهم: وراحت رافعة سماعة التليفون وكلمت حد وقالتله الحقني السواق اللي معايا فتح بنطلونه وبعدين طلبت مني إن أنزلها الشنط اللي كانت معايا في العربية روحت منزل الشنط فعلًا، وقلت أنا هفضل واقف معاكي لحد لما حد يجي يخدك من اللي كلمتيهم علشان الطريق مقطوع وفضلت واقف حوالي دقيقتين ثلاثة وبعد لم دورتها في دماغي خفت اللى جيلها ده يمسك في خناقي ويفتكر إني كنت عايز أعملها حاجة فرحت بصراحة خدت بعضي ومشیت.
وأضاف المتهم: وبعد کده خدت بعضی وروحت البيت لحد لما لاقيت النهاردة الساعة 2 بليل ضابط مباحث وأمناء شرطة من الوراق دخلوا عليا الشقة قالولي إيه اللي حصل وأنا ساعتها حكتلهم اللي حصل زي ما قلت لحضرتك دلوقتي وودوني على قسم ثان الشيخ زايد واتعملى محضر واتعرضت على النيابة دلوقتى وهو ده كل اللى حصل.
