أحمد عز عن الاستعانة بالراقصات في ولاد رزق: عمرنا ما قصدنا الإساءة لمصر
رد الفنان أحمد عز، على تعليقات البعض حول فكرة الاستعانة بالراقصات في فيلم ولاد رزق 3، مؤكدًا أن لم يكن الغرض يومًا من ذلك القصد الإساءة لمصر أو تصدير فجاجة.
وقال أحمد عز خلال مؤتمر صحفي لفيلم ولاد رزق 3، الذي أقيم أمس بمركز المنارة: عمر ما كان الغرض الإساءة لمصر أو تصدير فجاجة، ومش عشان إحنا في بلد ضيوف أننا نقدم بشكل مختلف عن كان ما تقدم، لا إحنا بنقدم حالة الفيلم وعالم ولاد رزق، اللي كان موجود في الجزء الأول والتاني واللي اتنفذ في الجزء الثالث، فأرجو أن نبتعد عن التعصب لأن ده مش في بالنا خالص.
وتابع أحمد عز: إحنا عايزين كل الغرض في ولاد رزق نسعد الناس، والكلام اللى بيتقال بالتهريج اللى بيحصل هو الغرض أن نبقى في الفريم اللى موجود في الشارع وبنسمعه، وأن إحنا نقدم العمل بشكل شيك مش نقدم بشكل فيه فجاجة، عالم دي طريقة لغتهم وكلامهم لا أكثر ولا أقل ومفيش في دماغنا برا الموضوع ده خالص.
وأضاف أحمد عز: الغرض أن نسعد الناس مش عشان نقول مين أفضل ومين أوحش، ومصر والسعودية هى بلد واحد وإحنا اتربينا على كده فمفيش حاجة جديدة حصلت بالعكس، إحنا لازم نشكرهم ولما بنروح هناك مبنحسش إننا برا مصر، ولما بقعد هناك بقولهم تعالوا مصر عشان نرد ليكم الجميل فإحنا شعب واحد وبلد واحدة في الآخر.
