محمود عزازي: تجسيد شخصية عبد الحليم عطلني.. وأتمنى تقليد عادل إمام يغير الفكرة عن قدراتي

تحدث  محمود عزازي عن بدايته في مسرح الجامعة حتى مشاركته في أكثر من عمل وشهرته، مشيرًا إلى أنه خريج كلية التجارة جامعة القاهرة، وكان محظوظًا بأنه وزملاءه في الدفعة أصبحوا نجوما حاليًا مثل محمد سلام ومحمد فراج ويحيى محمود وتايسون.

وقال عزازي في لقائه مع القاهرة 24: أنا ابن مسرح الجامعة، وبدايتي جامعة القاهرة كلية التجارة، وفخور إني دفعة تجارة لأن طلع منها فراج ومحمد سلامة ومحمد شاهين ويحيى محمود وتايسون وما إلى ذلك.

محمود عزازي يتحدث عن بدايته في التمثيل 

وأضاف متحدثًا عن بدايته الفنية في التمثيل: في بدايتي كانت فيه خطوات حلوة ومبشرة لكن بعدها حصلت فترة إخفاق كذا سنة، وبدأت في فترة من 2005 وحتى 2007 أشارك في أدوار صغيرة جدًا في مجموعة من الأعمال لدرجة إني أحيانًا لما كنت أتفرج على عمل بلاقي نفسي في مشهد، وبكون ناسي إني كنت مشارك من كثرة الأعمال اللي شاركت فيها بمشاهد قليلة.

وأشار محمود عزازي، إلى أن بداية شهرته كانت من خلال مشاركته في فيلمي ورقة شفرة وسمير وشهير وبهير، قائلًا: الناس عرفتني وكانوا في البداية بيقولوا لي شربيني وبعد سمير وشهير وبهير بقوا يقولوا لي عبد الحليم، وبعدها بقى ميكس وربنا كرمني بأدوار كتير ومساحات كويسة.

مش عارفين يشوفوني غير في عبد الحليم وده عطلني

وتابع: لكن ما زالت الناس واقفة عند عبد الحليم، مش اللي في الشارع بس ولكن أصحاب القرار في المهنة مش عارفين يشوفوني غير في عبد الحليم لحد ما كنت هندم أني عملته، وعندي أمل أن انتشار الفيديو الأخير اللي بقلد فيه عادل إمام يوضح وجهة النظر اللي كنت بحاول أثبتها، إن مش الفكرة عبد الحليم وإن ربنا موفقني إني أجسد وزي ما خليتك تصدق إني عبد الحليم أقدر أخليك تصدق أني دكتور وحرامي ومهندس، وإني عادل إمام وأي حد.

واستكمل: من 2011 لـ 2017 اشتغلت عملين شربات لوز والداعية وربنا أراد إني ما أترشحش لأي حاجة بسبب حصري في إطار عبد الحليم، لحد ما بدأت من الصفر لأن كان فيه جيل جديد طلع زي علي ربيع وأوس أوس ومصطفى خاطر وأصدقائي خدوا خطوات أعلى وأنا كنت في النص واقف وتوهت في وسط الضغط فاضطريت أبدأ من الأول كأني ماعملتش حاجة لحد ما بدأت شاركت في بحر وإلا أنا وانحراف وسره الباتع.