وسام هلال: أغنية حد سكة بتدمج بين الموسيقى العالمية والشعبية المصرية.. وطارق الشيخ إضافة للعمل
كشفت المطرب والـ DJ السوري وسام هلال، تفاصيل أغنيته الجديدة حد سكة، التي يتعاون خلالها لأول مرة مع المطرب الشعبي طارق الشيخ، معربًا عن سعادته الكبيرة بالتعاون، مؤكدًا أن طارق أضاف الكثير للعمل.
وقال وسام هلال، خلال لقائه مع القاهرة 24: أغنية حد سكة بتدمج الاستايل اللي أنا معروف بيه، اللي هو الموسيقى الإلكترونية العالمية مع ستايل النجم الرائع طارق الشيخ، وفكرة الأغنية جت من أننا ندمج فكرة الموسيقى الإلكترونية العالمية اللي بعملها مع الموسيقى الشعبية المصرية.
وتابع وسام هلال: طبعًا أنا سعيد بوجود النجم طارق الشيخ اللي أضاف للأغنية كتير من صوته الرائع والموهبة الرائعة كانت الأغنية محتاجاه علشان توصل، وإن شاء الله يعجب الناس.
أما عن سبب اختياره للتعاون مع المطرب طارق الشيخ، علق وسام هلال: مش موضوع اختيار لطارق الشيخ، أنا مبسوط إن طارق الشيخ وافق يكون معانا في العمل، وطارق الشيخ واحد من أصوات مصر، وطبعًا هو وعبد الباسط حمودة من الأصوات الشعبية اللي مسمعة عند الناس، ومكنش هيكون في اختيار أحلى من طارق الشيخ.
طارق الشيخ يكشف كواليس أغنية حد سكة
وكان المطرب طارق الشيخ، كشف في لقائه مع القاهرة 24، كواليس أغنية حد سكة، قائلًا: أنا عجبتني فكرة المزيكا، ومترددتش طالما المزيكا جديدة، إنما لو مزيكا زي اللي أنا عملتها هفكر كتير، وأنا مع التجديد.. لازم كل ما أدى حاجة ندي الجمهور حاجة جديد.
