محمد أبو بكر: الحج بتأشيرة زيارة خداع.. ومن ترك أبويه لمسؤولية شركات السياحة عاق
تحدث الشيخ محمد أبو بكر، أحد علماء الأزهر الشريف، عن مسألة الحج عن طريق تأشيرة الزيارة، والتي أثارت أزمة وجدلا واسعا خلال الأيام الماضية، وكذلك عن من يتركون والديهم فريسة لشركات السياحة لأداء فريضة الحج دون وجود أحد من الأبناء لمساعدتهم.
من ترك أبويه لمسئولية شركات السياحة خلال موسم الحج عقوق
وقال العالم الأزهري خلال تصريحات تليفزيونية: حرام عليكم ترموا أبوكم وأمكم لشركات سياحة لا تتقي الله والاسم طلعتوهم الحج، مضيفا: إلى كل ابن فاكر إن البر إنه يرمي أبوه أو أمه الطاعنين في السن واللي عندهم أمراض إلى شركة سياحة مهما كانت درجتها وتديهم فلوس وتقول لهم اتفضلوا اطلعوا الحج، أنت فاكر إن ده حج، يؤسفني إني أقولك إن ده عقوق.
وواصل العالم الأزهري: البر مش فلوس، البر تاخد أبوك وتطلع أنت بيه، وتكون خدام لأبيك، لو مش قادر خلاص، والله قال: وَلِلَّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلًا.
وأكمل: السنة دي أنا شفت ناس أغمى عليها خلال عرفة ومنى وفي جميع المناسك، والناس مش عارفة تتعامل معاهم، أصل ابنه رماه للشركة ومشي، مضيفا: فيه ناس أخلاقها لا تطاق يبقى مينفعش معاهم غير ابنه أو بنته، أنا مش هستحمل يشتمني أو يهينني أو يسبلي على عرفة، أنت عارف أخلاق وطباع أبوك فهتعرف تتأقلم معاه.
واستكمل: إيه اللي يجبر واحد مهمته إنه شيخ فقط مع الحجاج يقوم بأدوار مش دوره، في شيخ خلال موسم الحج هذا العام راح يجيب أكل لحاج كبير في السن، الراجل لبسه الطبق في وشه، قائلا له: أنت مبتفهمش، أنا مبكلش الحاجات، فنت أولى الناس بأبيك وأمك.
وأردف: حسبنا الله ونعم الوكيل في شركات السياحة التي نصبت على الناس، واللي طلعتهم بتأشيرات زيارة وخدعتهم وأوهمتهم إنهم هيحجوا، الناس في رقبتهم وهتتحاسبوا عليهم يوم القيامة، وهيجيبوكم يوم القيامة.
