الونش: هناك أندية نظرت لمصالحها الشخصية ورفضت انضمام لاعبيها للمنتخب الأولمبي
كشف محمود حمدي الونش عن رأيه فيما فعله الزمالك بعدم خوض لقاء القمة، بالإضافة إلى رؤيته للأزمة التي أثيرت بسبب المنتخب الأوليمبي.
تصريحات الونش
وقال الونش في تصريحات تليفزيونية: الزمالك عمل الصح وهو عدم لعب القمة بسبب التحكيم؛ لأنه شايف أن الموضوع خد حد زيادة وكان لازم يبقى فيه واقفة، وبالنسبالي كان لازم يبقى فيه واقفة والموضوع بقى رخم أوي لأننا موفرين كل حاجة.
وأضاف: فيه حكام كويسين وبيشتغلوا على نفسهم وفيه كتير منهم صحابي، لكن أن يبقى موفر ليك كل المقومات وبردو تغلط دي حاجة مش طبيعية، والغلطات الصغيرة عمري ما هتكلم مع حكم فيها لكن الغلطات الكبيرة دي مشكلة لازم تقف عندها.
وواصل الونش في تصريحاته: الحاجة الوحيدة اللي بتعليني هي شغلي في الملعب ومفيش مدير فني عاوز يخسر ومفيش جمهور يتمنى فريقه يخسر، وطبيعي بيشوف اللاعب اللي مقصر وينتقده.
وأوضح: الجمهور مينفعش حد يتكلم معاه لأن الجمهور هو الجمهور، وكل واحد ليه وجهة نظر وأنا كواحد مسؤول في المنظومة اللي الجمهور بيشجعها أعمل اللي يرضي الجمهور ومليش علاقة بالجمهور التاني، تركيزي مع نفسي فقط ومليش علاقة بالمنافسين وقصف الجبهة مش هيخيلني ألعب الماتش الجاي، والجمهور ساعات بيخلي اللاعب يعمل كدة بأنه يسقفله واحنا مش عاوزين كدة ومليش في قصف الجبهات.
وعن المنتخب الأوليمبي، أفاد محمود حمدي الونش: هناك أندية نظرت لمصالحها الشخصية ورفضت انضمام لاعبيها لـ المنتخب الأولمبي.
وأردف الونش خلال تصريحاته: مؤمن سليمان أكثر من دعمني في بدايتي مع الزمالك وهو مدرب ناجح، وكوبر اختارني للمنتخب في 2018 قبل كأس العالم وكانت مفاجئة كبيرة بالنسبة لي، أما كيروش كان دايمًا يوصل للاعبي منتخب مصر اللي محتاجينه من المباراة، ومباراة نيجيريا في افتتاح أمم إفريقيا 2021 كانت بمثابة قلم فوقّنا.
وعن تطور المستوى، أضاف: فيريرا وكوبر وسامي الشيشيني كان لهم دور كبير في تطوير مستوايا مع الزمالك ومنتخب مصر، وتداركت الأخطاء التي وقعت بها في البدايات مع الزمالك بالتطور والعمل مع محلل أداء، وبقول لـ حسام عبد المجيد دائمًا أتعلم مني عشان متكررش الأخطاء.
واختتم الونش تصريحاته قائلًا: عمري ما طلبت الرحيل عن نادي الزمالك، وأفضل لحظات حياتي في الزمالك هو وقت التتويج بالبطولات ولدي 11 لقبا مع الأبيض.
