الونش: مباراة الأهلي في السوبر الإفريقي عادية بالنسبة للاعب الكبير
كشف محمود حمدي الونش نجم دفاع الزمالك ومنتخب مصر، بعض التفاصيل عن إصابته، ورؤيته لمباراة الأهلي في السوبر الإفريقي المقبلة.
تصريحات محمود حمدي الونش
وقال الونش في تصريحات تليفزيونية: أنا ماشي بصورة كويسة في العلاج والإصابة الأولى علمتني ازاي أتعامل مع الموضوع واحدة واحدة من غير استعجال وبشكر محمد أسامة طبيب الزمالك، ومحمد أبو العلا طبيب المنتخب، اللي تعبوا معايا، ومر الكثير ولم يبقى إلا القليل.
وأضاف: في الإصابة الأولى عملت العملية في ألمانيا وعلاج طبيعي في دبي وقطر على أعلى مستوى ونزلت بعد 6 شهور مش 8 عشان كان عندي شغف إني عاوز ألعب، وحاولت أنزل ألعب لكن معتمد جمال مرضيش يجازف بيا وعشان كدة مروحتش المنتخب، ولكن بعدها لعبت البطولة الودية في الإمارات بعد ما أتأكدت أن كله تمام وتعاملت مع نفسي إني فورمة ونسيت إني كنت مصاب.
وأكمل الونش: بعد مباراة أهلي جدة عملت تيست صليبي ومكنتش حاسس أنها صليبي، وبين الشوطين الدكتور قالي دي بطولة ودية ومش مستعجلين على حاجة، وبعد ما رجعنا القاهرة نزلت أول تمرين مع جوميز ولقيت نفسي بعد كرة مشتركة سمعت الطرقعة في نفس القدم.
وواصل الونش: عندما أصبت بقطع في وتر الخلفية رحت لنفس الجراح اللي عمل نفس العلاج من الإصابة دي لـ ماني وهاري كين وصلاح كان جالي ساعتها مش ساعة الصليبي.
وتابع الونش: خلصت الجزء الأول من العلاج والجرّاح هيقولي أمتى هخش أول مران جماعي مع الفريق، وكمان شهر هكون عديت مدة 6 شهور.
وعن المقارنة بين أوسوريو وجوميز، أردف الونش خلال تصريحاته: أوسوريو متمرنتش معاه كتير لكن كنت بقعد اتفرج وهو راجل زي الفل لكن عنده سِنّة إني مش بعتمد الخصوم اللي قدامي، وأن أنا أنزل أطبّق شغلي وبعدين يتفاجأ ودي كانت سلبية الراجل لكن هو كمدرب كويس جدا، أما جوميز فهو شخصية متفاهمة للغاية وفهم عقلية اللاعب المصري سريعا ومدرب شاطر وبيقرأ الخصوم وبعدها يطبق شغله على أداء الخصم، وعنده توازن.
وأردف محمود حمدي الونش: أجواء النادي كانت تقلقنا في الفوز بالكونفدرالية لكن بعد ما الصفقات جت حسينا أننا نقدر نعمل حاجة بالإضافة للجمهور اللي صابر على اللاعيبة وفي ضهرنا على طول.
واستطرد الونش: الصفقات الجديدة صنعت الفارق وساعدتنا على حصد الكونفدرالية وقولنا للاعيبة قبل نهائي الكونفدرالية مينفعش الجمهور يروح زعلان ودعمت اللاعيبة نفسيا أنا وشيكابالا وركزنا على استغلال الدقائق الأولى، ولكن البطولة إنكار ذات لكل الناس ومكنش ينفع تخرج لأن دي كانت أملنا الوحيد بعد خسارة نهائي الكأس من الأهلي في السعودية.
وزاد الونش: بحضر كل ماتشات الزمالك في القاهرة، وبالنسبالي اللعب أصعب من المشاهدة، “ألعب أي ماتش في أي بطولة معنديش مشكلة”.
وعن مباراة الأهلي والزمالك في السوبر الإفريقي، قال الونش: أتمنى اللحاق بهذه المباراة، وبشكل عام فإن مباراة الأهلي والزمالك بطولة لوحدها والماتش هيبقا ليه شدة مختلفة على مستوى اللاعيبة والإدارة والجمهور وإن شاء الله لاعيبة الزمالك ساعتها تكون في موعدها خصوصًا أننا لسة خسرانين بطولة قارية.
وأشار الونش إلى أن مباراة الأهلي في السوبر الإفريقي من أهم مباريات الموسم، ولكنه مثل أي لقاء بالنسبة للاعب الكبير.
وأوضح الونش: طبيعي أحاول أقلل من أخطائي في الماتش دا بالذات وبالنسبة للاعب الكبير مباراة عادية زي أي مباراة هحترم الأهلي وهطلع أحسن حاجة عندي.
واختتم الونش تصريحاته، قائلا: جماهير النادي بتحبني ودا تعب سنين وإن شاء الله أرجع من الإصابة وأدافع عن تيشيرت الزمالك، لكن جمهور الفريق عاطفي زيادة عن اللزوم وبيشيل اللاعيبة على راسه من أقل حاجة، بمعنى لو أي لاعب عمل موقف بسيط ومشي بعد 6 شهور هيتحسب على الزمالك وهيتم دعمه من جانب الجماهير في أي نادي يروحه.
