محمود سعد يعلق على أزمة اللاعبة شهد سعيد: إحنا ولاد حواري والرياضة أخلاق
علق الإعلامي محمود سعد على واقعة تعمد اللاعبة شهد سعيد إصابة اللاعبة جنة عليوة، خلال منافسات بطولة الجمهورية بالسويس للدراجات، ومن ثم الإعلان عن مشاركتها في دورة الألعاب الأولمبية القادمة في باريس، وذلك رغم قرار الاتحاد المصري للدراجات بايقاف اللاعبة لمدة عام، وتغريمها ماليا بسبب واقعة الاعتداء على زميلتها.
وقال محمود سعد في فيديو عبر حسابه بموقع فيس بوك، إنه تخيل جنة عليوة ابنته وحدث لها ما حدث وشعر بالحزن.
كما كشف محمود سعد تفاصيل ما حدث مع شهد سعيد وجنة عليوة، قائلا: الحكاية للي ميعرفش أنهم كانوا في سبق دراجات وشهد دخلت في البنت جنة ورمتها على الرصيف بالعجلة بتاعتها، وكملت ومالتفتش تبص، وبعد شهرين من الحادثة البنت دي موجودة في أوليمبياد فرنسا بتمثل مصر، تحت شعار فيه أولويات وإحنا عاقبناها محليًا.
محمود سعد: تخيلت نفسي مطرح جنة
وأضاف محمود سعد مستنكرًا: في إيه، إحنا بنعمل إيه في الناس؟ أنا تخيلت نفسي مطرح جنة وشفت شهد سعيد مسافرة في البطولة وإحنا قاعدين نتفرج، ومعرفش جنة دي حصل لها إيه، تحت شعار أولويات، دي لو بطلة العالم في اللعبة بتاعتها أنا كراجل مسؤول هقولها ما تسافريش، لأن الخبر ده لو اتذاع هناك هتبقى فضيحة بجلاجل.
محمود سعد: الرياضة أخلاق قبل كل شيء
وأكد محمود سعد أن الرياضة أخلاق قبل كل شيء وأن عائلة الفتاة شهد كان من المفترض أن تسعى لأن تأخذ ابنتهم عقابا قائلًا: إحنا ولاد حواري مش ولاد أحياء راقية ولا نوادي جزيرة وعارفين أن الرياضة أخلاق، ولا هي بقيت حاجة تانية وهما غيروها؟، وبنشوف اللاعب اللي مرضيش يلاعب لعيب علشان كان مصاب، دي الأخلاق، لكن بنت ضاربة بنت متعمدة حسب الصورة اللي شفناها بدليل أن الاتحاد عاقبها، معناه أنها اخطات في جزء مش رياضي لكن أخلاقي.
وواصل: أنا آسف يمكن والدا شهد يزعلوا مني، لكن أنتم كنتم لازم تسعوا أن شهد تاخد عقاب كويس علشان تعرف تتعامل مع الحياة، لأنكم لما تسيبوا بنتكم تعمل كده وبعدين تسافر في بعثة دولية وتحضر بطولات، دي مش حاجة تبسطكم.
محمود سعد: الحياة لأصحاب القوة والنفوذ
واستكمل: الحياة مش لمن يجرؤ، ولكن لأصحاب القوة والنفوذ، إذا كنتم هتخلوا الحياة كده قولوا لينا نبقى عارفين علشان منبقاش بنتكلم كلام أهبل وعبيط في القيم، ياما نسكت ونشرب من البحر، يا أما نتعامل مع الزمن الجديد اللي لا فيه مبادئ ولا قيم، ومش فاهم ولا قادر أفهم عاوز كل حد يحط نفسه مطرح والد ووالدة جنة ووالد ووالدة شهد سعيد اللي سافرت، هل هما فرحانين باللي حصل ولو تسعدهم يبقوا عندهم مشكلة كبيرة.
واختتم: رئيس الاتحاد معرفوش وكل الاحترام والتقدير له لكنه مكنش موفق في احتيار العبارة الخاصة بالأولويات، لو كان قال إننا عقبناها محليا ومفيش عقاب دوليا طبقا للائحة لكني معنديش فكرة، ولكن لم يحالفه الحظ في اختيار التعبير في الآخر، وفي النهاية حط في اعتبارك أن كل اللي بيهاجموا السوشيال ميديا لازم يلتفتوا أنها بتبين لنا كل الحاجات الغربية والعجيبة اللي بتخليك مش عاوز تضرب دماغك في الحيط، لكن بتسأل ليه كده وفين المنطق وأنت بتاخد المجتمع وتروح فين، الحاجات الصغيرة دي بتعمل أثر كبير مع الوقت لأن بيتبني عليها حاجات وحاجات.
