جنة عليوة تكشف موقفها من سفر شهد سعيد لـ الأولمبياد وسير القضية المرفوعة ضدها
كشفت جنة عليوة لاعبة المنتخب الوطني للدراجات، كواليس الفيديو الذي انتشر لها رفقة زميلتها شهد سعيد على وسائل التواصل الاجتماعي، وتوابع هذا الأمر الآن، وموقفها من سفر شهد سعيد لـ الأولمبياد وسير القضية المرفوعة ضدها والجلسة المنتظرة لها.
وقالت جنة عليوة، إحنا كنا في سباق جمهورية في السويس، وكنا خلاص داخلين نهاية السباق، وأنا كنت ماشية ومش مركزة أن شهد خلفي، وفجاءة لقيت حد خلفي بيمسكني من ذراعي على الأرض، ومن وقتها مفيش أي اعتذار ولا أي حاجة، والجميع يعلم أن هذا الأمر عن تعمد مش اختلال في التوازن، لأن لو اختلال في التوازن هي تقع أنا أقع ليه.
وأضافت جنة في لقاء مع قناة إكسترا نيوز: حصلي كسر في الترقوة وركبت شريحة و7 مسامير، وحصلي كدمات في الجمجمة وجروح في جسمي كله وفقدان في الذاكرة لفترة كبيرة، ومش فاكرة من الوقعة غير أني وقعت، لأن أول ما وقعت كان عندي امتحانات ومكنتش مركزة، وبعد كده ابتديت أبقى أحسن وعملت علاج طبيعي وتأهيل وده فرق معي جدا.
وحول الدوافع التي دفعت شهد لفعل لذلك، أوضحت جنة: كان في مشاحنة من قبلها علشان إحنا كسبانين سباقين اليوم اللي قبله، ودي أول مرة بالنسبة لهم يخسروا السباقين دول، وهي من أول السباق مش بتعمل حاجة غير أنها ماشية خلفي وأنا أقوم هي تقوم أنا أقعد هي تقعد هي واخده أوردر أنها المهم تكسبني وأنا مش عارفة أيه السبب.
وحول انتشار فيديو الحادثة وتعليق الكثيرين عليه قالت جنة: ده من عند ربنا ومحدش بيدافع عنها غير مدربها تقريبًا، والناس شايفة اللي حصل بالظبط.
وحول تمثيل شهد المحتمل في الأولمبياد وانتشار ذلك الأمر، قالت جنة: مش فارق معي شهد تمثل مصر في الأولمبياد ولا لا، لكن اللي يفرق معي أنها لو هتجيب ميدالية لمصر ده يفرق معي، لكن هي بشخصها مش هتفرق معي تسافر ولا ولا.
أما عن الإجراءات القانونية التي اتخذتها جنة بعد الواقعة قالت: إحنا روحنا المستشفى وهما عملوا محضر هناك علشان دي حادثة وإحنا كملنا في المحضر وإن شاء الله عندها جلسة، أنا مبسوطة أن الرد ظهر وهجيبولي حقي إن شاء الله وأنا بشكر الناس كلها بجد لأن هما من غيرهم مكنش يتعرف أن شهد رايحة الأولمبياد والناس جابتلي حقي.
