تصريحات اللاعبة شهد سعيد مع ياسمين عز: تأهلت للأولمبياد قبل الواقعة.. ووالدة جنة كانت عاوزة تحبسني
تحدثت اللاعبة شهد سعيد، عن تفاصيل واقعة تعديها على زميلتها جنة عليوة، حيث أكدت أنها لم تكن تقصد ما حدث ولكن اختل توازنها، مشيرة إلى أنها حاولت التصالح معها ولكنها رفضت.
وقالت شهد خلال مداخلة هاتفية في برنامج كلام الناس، التي تقدمه الإعلامية ياسمين عز، إنها شعرت باختلال توازنها خلال السباق ولم تكن تقصد ما حدث، مضيفة: اختل توازني فسندت عليها فهي وقعت ولكن والله ما كان قصدي أذى، ولما وقعت أنا كملت السباق بس رجعتلها تاني اطمن عليها لقيت الإسعاف خدتها، وأنا خدت عقوبة على ذلك.
أنا متأهلة قبل للاولمبياد قبل اللي حصل ده
وأضافت: هي بتقول إنها اشتكتني للحكم وده محصلش لأن أنا اللي اشتكيت أختها لأنها حاولت توقعني قبل كدة، وخدت إنذار 4 مرات، وليه هأذيها عشان أكسب وأنا متأهلة للأولمبياد قبل اللي حصل ده.
رفضت التصالح ومامتها شتمتني ودعت عليا
وتابعت: لما رحت القسم مكانتش راضية تتصالح وقالت لي هحبسك وانتي مجرمة وزقتني، وأنا اتصدمت لأني كنت قايمة اعتذرلها وأبوس دماغها، ومامتها شتمتني ودعت عليا وقالت لي هحبسك وأنا والمدرب كنا مذهولين، هل دي الرياضة يعني أنا بنت عندي 19 سنة أروح قسم علشان بلعب رياضة.
وكشفت عن العقوبة التي حصلت عليها بعد الواقعة قائلة: اتعاقبت واتشطبت من السباق واتوقفت سنة محليًا ودفعت 5 آلاف جنيه بس ده ملهوش علاقه بالأولمبياد.
وأكملت مستنكرة: قعدنا في القسم بعد الواقعة حوالي 7 ساعات وقعدت تحكي اللي حصل وأني زقتها، طيب أنتي ازاي يا حبيبتي عندك فقدان ذاكرة وارتجاج في المخ وبتحكي اللي حصل.
وأردفت: جنة بتقول أني مش بطلة ولا بلعب، لكن أنا كنت الأولى على إفريقيا مرتين ورا بعض وبطلة العرب وحطمت الرقم الإفريقي والعربي فإزاي مبعرفش العب، وأنا لو مكانها وهي دخلت الأولمبياد كنت هتمنالها كل خير والله، ولي الشرف إني دخلت الأولمبياد وهلعب باسم مصر.
دمرتني ودمرت نفسيتي وشـوهت سمعتي
واختتمت حديثها قائلة: بقولها أنا آسفة ليكي بس مكنتش أقصد والله، بس هي دمرتني ودمرت نفسيتي وشوهت سمعتي وقفلتني من اللعبة وأنا بفكر اعتزل.
