بعد نشر القاهرة 24.. العرجاني جروب تستجيب لـ مريم حنفي سيدة الدليفري
أثارت مريم حنفي عاملة الدليفري، التي ظهرت حاملة لأطفالها على سكوتر خلال تأدية عملها في خدمة توصيل الطلبات، ضجة واسعة عبر منصات التواصل الاجتماعي.
العرجاني جروب تستجيب لـ مريم حنفي
وتوجهت مريم حنفي بالشكر عبر القاهرة 24 إلى الكابتن عصام العرجاني المدير التنفيذي لشركة العرجاني جروب، بعد دعمه لها ومساعدتها، قائلة: كابتن عصام العرجاني طلب من الناس إنها توصله بيا، وناس كتير أوي بعتت رقمي له، وبالفعل تواصل معايا والمقابلة تمت النهاردة، وفعلًا وقف جنبي وساعدني وبزيادة.
وقالت مريم حنفي عاملة الدليفري، في تصريحات خاصة لـ القاهرة 24: زي ما وعد وفى، والكابتن عصام العرجاني مش محتاج شو، لكن مقدرش متكلمش عنه، وعن مساعدته ليا، يكفي إنه قال لزوجي مفيش شغل 18 ساعة تاني، وأنت لازم تقعد في وسط ولادك، وهتشتغل معانا أمن في الشركة.
وأضافت مريم حنفي: الراجل ده مشكور ومش هبطل أحكي لولادي عنه، وعن مساعدته ودعمه ليا، هو سبب في خير كبير حصل ليا، وربنا رضاني، ونهاية الصبر جبر، وقدملي مساعدات كتيرة وكلها على راسي.. زي ما وعد وفى وبشكره على اللي مقابلته ليا والدعم الكبير اللي قدمهولي.
مريم حنفي عاملة الدليفري
وأردفت مريم حنفي عاملة الدليفري: في مكتب سياحة قدملي رحلة عمرة مجانًا، لكن أنا أهديتها لوالدتي، وصاحب المكتب عرف قصتي بعد نشر القاهرة 24، وبعدها كلمني وقالي مبروك كسبتي معانا رحلة عمرة، ومكنتش مصدقة نفسي زي بردوا ما مكنتش مصدقة نفسي، وأنا قاعدة قدام عصام العرجاني انهاردة، وأنا حبيت أهدي رحلة العمرة لوالدتي لأنها ربت وشقيت معايا وعلمتني وصبرت عليا.
واختتمت مريم حنفي حديثها قائلة: أنا تفاجأت بالصورة وأتوجه بالشكر للي صورها، وفعلًا أنا مكنتش بعمل شو ولا بسعى للتريند، لأن زي ما فيه ناس كتير دعمتني وساندتني فيه قلة هاجموني.
