مي كساب: أقنعت شيماء سيف تعمل تكميم معدة.. ومحدش يعرف المعاناة اللي عشناها مع السمنة
تحدثت الفنانة مي كساب عن سبب إقناعها الفنانة شيماء سيف للخضوع لعملية تكميم معدة، مشيرة إلى أنها رأت معاناتها خلال التصوير، ولحبها الشديد لها أقنعتها خاصة بعد خضوعها هي للعملية، ورؤيتها لنتائجها الإيجابية معها.
مي كساب: لاحظت معاناة شيماء سيف خلال التصوير
وأوضحت مي كساب، في لقاء إذاعي لها، أنها لاحظت معاناة شيماء سيف مع السمنة خلال التصوير، قائلة: لما روحت ليها في المسلسل ألف حمد لله على السلامة ضيفة شرف، وإحنا بنعمل أحد المشاهد، شفتها مش مرتاحة قلت لها مالك قالت لي رجلي تعباني، ووصلت لوزن أكتر من لما كنا في بنصور مسلسل أحلام سعيدة.
وأضافت مي كساب، أن قرار اتخذها لعملية تكميم معدة لم يكن سهلًا عليها، وحينما رأت نتائجه أقنعت شيماء سيف، معقبة: أنا كنت خايفة من العملية جدًا والموضوع ده مكانش سهل بالنسبة لي أني آخد قرار كبير زي ده، ولما خدته وشفت العواقب بتاعته وأني ما حصليش حاجة وأني مرتاحة أقنعت شيماء سيف.
مي كساب: الآثار الجانبية لتكميم المعدة أهون من مخاطر السمنة
وواصلت مي كساب، حديثها عن الآثار الجانبية للعملية: في آثار جانبية للعملية، ولكن بالنسبة للآثار الجانبية بتاعة التخن ولا حاجة، الشعر بيقع ماشي والجسم بيحتاج شوية فيتامين، العملية بتهذبك غذائيا وبتكون عارف أنت رايح تاكل ايه الأكل بيكون قدامي أنا بروح للمفيد، مش بجري ورا المكرونة والعيش، لأني عارفة إن وجبتي قلت.
وأشارت إلى إنها طمأنت شيماء سيف بكل الطرق وحكت لها تجربتها مع العملية، ورشحت لها الطبيب الذي تابعت حالتها معه، قائلة: قلت لها ما تخافيش وأنا هفضل معاكي، وحكيت لها كل اللي حصلت لي من وقت ما عملت العملية والعملية مفيهاش خطورة ولا حاجة، ورشحت لها نفس الدكتور وقلت لها لازم تعملي كده علشان صحتك.
وأكملت مي كساب: شيماء سيف كوميديانة من طراز خاص يعني خفة الدم مش موجودة، وسواء هي تخينة أو رفيعة هي بتضحك ببقها علشان الحملة اللي اتعملت وأنها خسرت نص كاريزمتها، مفيش حاجة اسمها كده هي مش بتضحك بالكرش والدهون بتضحك ببقوها بإفيهاتها اللي مفيش زيها وزي ما عندنا عمالقة في الكوميديا زمان هي عملاقة في الجيل الموجود ومش محتاجة تكون تخينة ولا رفيعة أهم حاجة صحتها.
مي كساب: اللي ميعرفش بيقول عدس
واختتمت: اللي ميعرفش بيقول عدس، هما مش عارفين إحنا عشنا إيه وشفنا إيه والناس سهل عليهم التعليق والأحكام، ولو شافوا إحنا عندنا معاناة قد إيه، وهي كانت بتحكي لي معاناتها في موضوع الصلاة ورجليها وعضمها وهي لسه صغيرة وأنا طبعا اللي أحبه اقوله يعمل العملية.
