أرفض تقديم شخصية بها إهانة.. سيمون: الناس بتقلدني وأختار أدواري بعناية لتتناسب مع مشواري الفني
كشفت الفنانة سيمون، عن خطوطها الحمراء في الفن، موضحة أنها تعمل على اختيار جميع أدوارها بعناية شديدة حتى تتناسب مع مشوارها الفني.
وقالت سيمون في تصريح خاص لـ القاهرة 24: أنا حاطة لنفسي خطوط حمراء في الفن، لازم الدور يكون في أجزاء من أحاسيسي بالموضوع، وفي نفس الوقت لازم يكون فيه احترام لـ الجمهور ولشخصي.
وأضافت: مقبلش أعمل أي شخصية مهينة لمجرد إنه تمثيل، التمثيل به جزء من الحقيقة، طب أنا هستفيد إيه لما أعمل كده، إيه الفكرة؟، أنا معملش شخصية فيها إهانة لا ليا ولا لجمهوري، ولا فيها أي منظر مش لطيف مش مفترض أني أعمل كده، ولا ده الفن اللي في دماغي.
وتابعت: الفن بالنسبة لي أن توجد أفكار حلوة، وتحبيني وتقلديني، ده أنا زمان وأنا صغيرة كانوا بيقلدوا فورمة شعري ولبسي وحواجبي فما بالك لو دور عجبهم؟ هيقلدوه، الناس لغاية دلوقتي حتى الأجيال اللي محضرتنيش بيقلدوني وبيقلدوا أغانيا، الحاجة الحلوة بتفضل عايشة، ومن حظي الحلو إن بدايتي كانت قوية جدًا، فمكنش يليق أني أكمل بطريقة مش لطيفة.
آخر أعمال سيمون
ومن ناحية أخرى، حققت الفنانة سيمون، نجاحًا كبيرًا خلال الموسم الرمضاني الماضي 2024، من خلال مسلسل صيد العقارب، والعمل كان من بطولة: الفنانة غادة عبد الرازق، محمد رياض، وسيمون وأحمد ماهر وميار الغيطي، ومن تأليف باهر دويدار، وإخراج أحمد حسن.
