سيمون: أنا الوحيدة اللي كملت الغناء مع التمثيل.. وآيس كريم في جليم بوابة الأفلام الغنائية
تحدثت الفنانة سيمون، عن تجربتها السينمائية وخاصة فيلمها الشهير آيس كريم في جليم الذي عُرض عام 1992، والذي تعاونت خلاله مع الهضبة عمرو دياب، موضحة أن هذا العمل كان بوابة الأعمال الغنائية بالسينما وقتها.
وقالت سيمون، عن بداياتها السينمائية، في تصريحاتها لـ القاهرة 24: أنا كنت في فترة ازدهار في السينما والأفلام، ومن حظي الحلو إن الفترة اللي أنا طلعت فيها كان فيها نجوم كتير ومطربين وحفلات كتير في مصر وكنا بنغني في مصر وخارج مصر، وأنا من حظي أن أول فيلم جالي كان مع سيدة الشاشة العربية الأستاذة فاتن حمامة، وهي أكدت على اختياري مع الأستاذ خيري بشارة، وكان معايا أختي وصاحبتي عبلة كامل، وكانت بداية قوية جدًا.
تصريحات سيمون عن السينما
وتابعت سيمون: جالي بعدها أفلام كتير وحسيت أني محتاجة فيلم مختلف وقوي، ولما جالي فيلم الهجامة مع الأستاذ أسامة أنور عكاشة وليلى علوي وهشام سليم وحسن حسني الله يرحمه، كان مختلف عن شخصيتي الغنائية تمامًا، كان صعب وقتها تلاقي مغنية وممثلة في نفس الوقت، وأنا الوحيدة اللي كملت مشواري في الغناء والتمثيل سينما وتلفزيون.
وأضافت: اتعرض عليا أفلام كتير جدًا بعد فيلم الهجامة ووقتها كان ممكن تعملي كذا فيلم مع بعض علشان الانتشار، وأنا طول عمري بعمل الحاجة بروقان مع أن ده بيخسر ماديات وتواجد قوي، ولكن حياتك بتروح مع شغلك والفن جزء من حياتك ولازم تستمتعي وتتفنني.
واستكملت سيمون: خيري بشارة اللي اكتشفني اختارني علشان أعمل فيلم آيس كريم في جليم مع عمرو دياب، وعمرو وقتها كان عامل فيلمين، ومكنش في فنانيين شباب بياخدوا بطولات، وكانت أول مرة يحصل اعتماد على نجوم شباب وكانت فكرة قوية جدًا وكان فيلم فيه فنانيين كتير مختلفين، وفعلًا الفيلم عمل صدى كبير عند الشباب وكانوا بيقفوا طوابير عند سينما التحرير في الدقي، وعمل حالة فنية وغنائية كبيرة، وبدأ من بعد الفيلم ده تحديدًا يتعمل أفلام غائية وبدأ مغنيين كتير يعملوا أفلام.
