استشاري نفسي عن فيديو تعدي زوجة على حماتها بالضرب: مش هتضربها من فراغ وبتتعرض لضغط
تداول مستخدمو مواقع التواصل الاجتماعي خلال الساعات الماضية، فيديو مؤثر تظهر فيه زوجة تضرب وتسحل حماتها، مما أثار غضب رواد السوشيال ميديا.
استشاري نفسي يعلق على فيديو تعدي زوجة على حماتها بالضرب
وقال الدكتور جمال فرويزة، استشاري أمراض نفسية في تصريحات خاصة لـ القاهرة 24: الفيديو يظهر معاناة الكثير من السيدات اللي أجوازهم بيسيبوهم ويسافروا، الست مش هتضربها كده من فراغ ده كله ناتج عن ضغط نفسي كبير جدًا.
وأوضح الدكتور فرويز: الزوجة تتعرض لضغط نفسي شديد والست مش هتضربها كده من فراغ ده كل ناتج عن ضعط نفسي كبير جدًا، وده سبب الاعتداء الصارخ اللي حصل ده، والست باينه في الفيديو بتمسح السلم وحماتها بتحرق دمها بالكلام وعشان كده انفجرت.
وأضاف فرويز: أوقات كتير كبار السن بيستغلوا سنهم الكبير بإنهم يعملوا تصرفات مستفزة، وممكن كمان تكون الحما غيرانة على ابنها لو بيبعت لزوجته فلوس وبيهتم بيها.
وتابع استشاري أمراض نفسية: الست دي من الشخصيات الانفجارية، والمس والسحر ده مجرد تبرير عشان تطلع من الموقف ولو مكنش في فيديو للحادثة كانت هتقول دي ست كبيرة وبتخرف وعندها الزهايمر.
وأكد فرويز: دي ست طالعة من الولادة وماسكة طفل وارد جدًا يكون عندها اكتئاب ما بعد الولادة مع الضعوط توصلها للمرحلة دي.
جدير بالذكر، أن الأجهزة الأمنية بالشرقية تمكنت من إلقاء القبض على الزوجة المتهمة بالتعدي على حماتها بالشبشب والدة زوجها بالضرب والسحل، وجرى اقتيادها إلى ديوان القسم للوقوف على أسباب وظروف وملابسات الواقعة.
