سيدة بالمنوفية تستغيث من جارتها: رمت عيالها في الشارع وراحت تتجوز
تداول مستخدمو مواقع التواصل الاجتماعي، مقطع فيديو لسيدة تستغيث بسبب جارتها، حيث تركت الجارة التي تدعى ولاء طفلتين أكبرهما تبلغ من العمر 10 سنوات، حتى تتزوج من رجل آخر.
سيدة من المنوفية تستغيث
وقالت عفاف رمضان، سائقة توكتوك بمدينة شبين الكوم، في مقطع فيديو نشر عبر موقع التواصل الاجتماعي تيك توك، البت دي لقيتها هي وأختها اسمها وعد عندها 10 سنوات، أمهم جارتي سابتهم وقالت لهم أنا هتجوز، وهما معايا من 6 أيام، ولما اتصلت على أبو الطفلة دي قالي مش عايزينها، والبنت التانية أبوها ميت، وأنا بترجى أي حد يوصلني بأهل البنت الصغيرة عشان يستلموها.
وقالت عفاف رمضان، في تصريحات خاصة لـ القاهرة 24، البنتين معايا، وعرفت إن أمهم كانت محبوسة ولما طلعت امبارح من الحجز، رمت لي العيال تاني ومسألتش عليهم، ومشيت وسابتهم لي، وهي أساسًا مبتقعدش مع عيالها، وكل اللي يهمني دلوقتي العيال الصغيرة لإن هي قلبها مش واكلها عليهم، ورمياهم في الشارع، والبت الصغيرة قالتلي امي رايحة تتجوز.
واستكملت عفاف رمضان، من يومين عرفت إنها محبوسة واللي ربنا قدرني عليه دفعت لها فلوس الكفالة عشان تخرج لعيالها، لكن لما خرجت مشيت وسابتهم تاني، وهي معاها 3 أطفال غير البنتين وسايباهم مع أهل أبوهم.
وأضافت عفاف رمضان، دي مش بتاعت عيشة وكنت كل لما أقولها خلي بالك من عيالك الصغيرين تمشي وتسيبهم برضه، وأنا مش عارفة أتصرف إزاي في البنتين اللي مشيت وسابتهم، ولا أعرف حاجة عنها ولا عن أهلها، ومعرفش هي منين أصلًا، الأم جت سكنت عندي في أوضة في شبين الكوم، ولما سألتها انتي منين قالتلي من السويس، وفي مرة تانية قالتلي من منوف، ودي مش أم حريصة على عيالها، وعرفت من بناتها انها اتجوزت كذا مرة وعلطول سايبة عيالها.
