سلوى محمد علي: جوزي كان في العناية المركزة.. والناس سابوا المرضى عشان يتصوروا معايا
كشفت الفنانة سلوى محمد علي، عن أصعب موقف تعرضت له مع الجمهور خلال الفترة الماضية، وكيفية تعاملها مع التعليقات السلبية للجمهور.
وقالت سلوى محمد علي، في لقائها مع القاهرة 24: أنا مباخدش بالي من الانتقادات ولكن الجمهور من حقه أنه يعلق بس دون تجاوزات أو إساءات وإحنا لازم نتقبل، ممكن نتقبل النقد كله حتى لو شخصي ولكن ده مش معناه إننا نغير من نفسنا.
وتابعت سلوى محمد علي: ساعات تعليقات الجمهور بتضايقني، وأكتر مرة اتضايقت فيها لما جوزي كان في العناية المركزة والناس سابوا المرضى اللي جايين يزوروهم علشان يتصوروا معايا، فأنا أظن أن مينفعش حد يتصور في المستشفى وبعدين يرجعوا يقولوا الفنان عمل تصرف.
سلوى محمد علي تكشف سبب تراجعها عن وصية خروج جنازتها من المسرح المصري
وسبق وأن كشفت الفنانة سلوى محمد علي، سبب تراجعها عن وصيتها بخروج جنازتها من المسرح القومي المصري، حيث قالت لـ القاهرة 24: التصريح قلب الدنيا وأنا شُفت ناس كتير شتمتني، أنا اتشمت بما فيه الكفاية، غيرت رأيي وتراجعت عن الوصية مش علشان الشتيمة، علشان مش هودي ولادي المسرح القومي ويدخلوا ميدان العتبة اللي أصلًا ميتدخلش، فأنا تراجعت عن الوصية علشان ولادي ميتعذبوش.
آخر أعمال سلوى محمد علي
ويعرض حاليًا لـ الفنانة سلوى محمد علي، مسلسل الوصفة السحرية، وحقق العمل نجاحًا كبيرًا، وشارك في بطولته: شيري عادل، عمر الشناوي، إسلام جمال، بسمة داود، هيدي كرم، وغيرهم من النجوم.
