أيمن بهجت قمر: تمردت على أمي بعد وفاة والدي واستخبيت تحت السرير من حسن مصطفى
كشف الشاعر الغنائي أيمن بهجت قمر، العديد من الأسرار الخاصة عن حياته الشخصية، بعد وفاة والده موضحًا موقف جمعه بـ الفنان الراحل حسن مصطفى.
وتحدث أيمن بهجت قمر خلال تصريحات تليفزيونية قائلًا: بعد وفاة أبي تمردت على أمي لأني مكنتش متعود أعيش معاها، وهي كانت عايزة تربيني تاني وأنا كبير، قلتلها عايز خالي يبقى وصي عليا، وهعيش لوحدي، كنت 16 سنة، وجيراني دلعوني ومسابونيش.
أيمن بهجت قمر يكشف سبب نجاح أغانيه
وتابع أيمن بهجت: أصعب حاجه الاستمرار في النجاح ولكن الإخلاص في العمل مهم، وبتوقف فترات لما بمر بضغط نفسي، وبرجع تاني.
وأضاف: عمار الشريعي كان بيقولي واد يا أيمن إنت من عندنا مش من عندكم وكنت مصاحب أبويا ولما طلق أمي كنت عايش معاه، ومات فجأة ولقيت نفسي بواجه الحياة لوحدي، فابتديت بعدها أعبر عن مشاعري بالشعر.
سمعت بلاوي الوسط الفني كلها: أيمن بهجت قمر يكشف خوفه من حسن مصطفى
وتابع حديثه: استخبيت تحت السرير من حسن مصطفى، وكنت طفل، وكان بيتخانق مع أبويا ويزعقلي عشان أنام بدري وأروح المدرسة، وكنت بفضل قاعد لحد الساعة 1، ولقيت أستاذ حسن بيخبط فدخلت استخبيت تحت السرير وسمعت بلاوي الوسط الفني كلها، وهما فكرين إني نمت وفجأة طلعتلهم قالولي إنت سمعت إيه؟
