ملكة جمال مصر سابقًا تحذر من إحدى الحضانات: بنتي صوابعها كانت هتطير.. وكل شوية ترجع معضوضة
روت ملكة جمال مصر السابقة آيسل خالد، تجربتها السيئة مع إحدى الحضانات التي تدعى Sesame club، حيث تعرضت ابنتها للعديد من الحوادث والتي لم تلق أي رد فعل من الحضانة.
ملكة جمال مصر سابقًا تحذر من حضانة
قالت آيسل خالد في منشور عل حسابها على إنستجرام: أنا كنت سبق قبل كدا وأعلنت لكم عن nursery اسمها Sesame club ودا فعلًا كان بعد ما تاليا فضلت فيها لمدة 10 شهور، وكنت مقدملها فيها زيها زي أي طفل الموضوع مكانش له أي علاقة بالـ marketing خالص لأن أنا ديما بختار لأولادي أحسن حاجة، مش الحاجة اللي يطلب مني أعمل فيها إعلان أقوم قايلة اه بقي ما أنا هعمل إعلان وخلاص.
وواصلت: وقت اختياري لـ الحضانة كان معروض عليا كذا مكان أودي أولادي فيه وأعملهم إعلان ومدفعش للأولاد ولا جنيه، المهم أنا اخترت إني أودي تاليا sesame club وزي زي أي أم هناك ولا معرفاهم أي حاجة عن نفسي، والدنيا كانت كويسة جدًا، وكان أي حد من أصحابي يقول لي رشحيلنا مكان كويس كنت بقولهم أنا ولادي فيها.
واستكملت آيسل خالد: بعد 10 شهور من وجود تاليا عندهم لقيتهم كلموني وقالولي أنهم عايزين يعملوا معايا شغل قلتلهم بس أنا رافضة فكرة إني أعلن على الـsocial media اسم الـ nursery اللي أولادي فيها، ودا لأسباب تخصني أنا وباباها، قالولي أنتي ايه انطباعك معانا قلتلهم الحمد لله حلوه جدًا وتاليا مبسوطة جدًا وبتحب الحضانة وبتحب المدرسين بتاعتها فقالوا لي خلاص إحنا هنصور الإعلان في فرع تاني غير اللي بنتك فيه، ومش لازم تقولي إن بنتك جوا الـ nursery قلت خلاص تمام مفيش أي مشكلة، وبعدها بكام شهر لما يوسف كبر شويه دخلته برضو مع تاليا بيدفعله عادي جدا بردو زيه زي أي طفل هناك.
وأردفت: لما اتنقلت لفصل أكبر والمدرسة بتاعتها اتغيرت ابتدي بقي مؤخرًا مرة تاليا تجيلي معضوضة ويكلموني يقولولي حصل كذا، وحضرتك ممكن تيجي تشوفي في الكاميرات.. أجي أشوف آلاقي الولد عضها ومكمل عض لحد ما استوعبوا إن البنت عيطت من العضة وبعدين فصلوها عن الولد وإحنا آسفين ومش هتتكرر تاني وهيتاخد رد الفعل المناسب، أنا لحد هنا أم متفهمة ووارد جدا أطفال يعضو بعض وكويس إن هما اللي بلغوني بنفسهم.
واستطردت ملكة جمال مصر السابقة: يعدي وقت وتحصل الكارثة الكبيرة، تاليا الباب يتقفل عليها من الناني في الحضانة ومفروض إن كل الأبواب هناك فيها صدادات عشان مفيش طفل يحط ايده، لقيت لأن هما الوقت دا نقلينهم في class تاني مش بتاعهم ومفيهوش الصدادات دي عشان الـ nursery كان فيها event اليوم دا فطبيعي الأطفال في class مش متعودين عليه يبقى لازم يكون في extra care وتركيز أكثر.
وأتمت: ألاقيهم بيكلموني إن تاليا الباب قفل على إديها وهنطلع بيها المستشفى تعمل أشعة كلمت دكتورتها، قالت لي تعمل أشعة طبعا وبعد ما خلصنا مستشفى، رجعت الـ nursery أشوف في الكاميرا إيه اللي حصل، ألاقي إن تاليا كانت واقفة ورا الباب والناني من غير ما تبص، إذا كان في حد ورا الباب ولا لا قفلت الباب على إيد تاليا.
