اعترافات المتهم بقتل صديقه بالبراجيل: كلم خطيبتي من ورايا وأخدها مني| خاص

حصل القاهرة 24 على نص تحقيقات المتهم بقتل صديقه داخل أرض زراعية، بسبب خلافات بينهما عندما ارتبط المجني عليه بخطيبة المتهم السابقة، في القضية التي حملت رقم 8584 لسنة 2024 جنايات أوسيم المقيدة برقم 2432 لسنة 2024 كلي شمال الجيزة.

تحقيقات المتهم بارتكاب جريمة البراجيل

واستمعت جهات التحقيقات المختصة إلى أقوال المتهم حسام. ص. خ، والتي جاءت: وبسؤاله حول ما هي تفصيلاته حول الواقعة؟ أجاب: أنا هحكي لحضرتك من الأول خالص اللي حصل بالضبط إني كنت خاطب واحدة والعلاقة ما بينا كانت كويسة جدًا لغايت ما شهر 2 اللي فات، ابتدي لقيت تصرفاتها معايا اتغيرت وطريقتها مابقتش حلوة خالص وتكدب عليا في حاجات كتير، وساعات أقولها أروح معاكي في أي مكان ترفض مش زي الأول معايا، وابتديت الشغل مع س. ب في المغسلة قعدت معاه في فرح واحد صاحبنا من البلد من فترة كبيرة لغايت ما قالي تشتغل معايا في المغسلة. 

وأضاف المتهم خلال أقواله أمام جهات التحقيقات: قولتله تمام أنا هشتغل معاك وفعلا ابتديت الشغل وأنا كنت خاطب، وكنت بحكيله كل حاجه عني أنا وهيا لما يكون ما بينا مشكلة، لغاية الأسبوع اللي فات لما ابتدا قبل شهر 3 على طول، لقيت سيد بريك صاحب المغسلة بيقولي رحاب خطيبتك رافعه بوست على الفيس بوك بتقول فيه تم بحمد لله فشكلة خطوبتي أنا استغربت جدا من طريقته معايا وقتها. 

واستكمل: وبعد كده لقيته يوم السبت الموافق 2/ 3/ 2024 وإحنا الصبح لسه كنا فاتحين المغسلة عشان نبدأ شغل، لقيته بيقولي أنا رايح معها مشوار عشان هيا اتصلت عليه أنا استغربت وقتها من اللي بيقولهولي وبعدين إيه علاقته بيها بالضبط، لغاية ما لقيته رجع على أذان العصر في نفس اليوم، فقولتله عملت إيه معها بالضبط قالي أنا كنت معاها في كذا مشوار وبعد كده خلصنا المشواير وروحتها البيت وأنا سكت ما رديتش أرد عليه لغاية ما اليوم خلص وقفلنا المغسلة مع بعض بليل متأخر بعد الساعة 10 العاشرة مساء. 

وأكمل المتهم: فقولتله أنا عايزك في موضوع مهم نتكلم فيه، قالي نوصل محمد بشير الأول وبعدين نتكلم في اللي أنت عايزه، وفعلا ركبنا المكنه بتاعتي بس سيد بريك هو اللي ساق المكنه، وأنا ركبت من ورا سيد على طول، ومحمد بشير ركب ورايا ووصلنا لبيته في قرية البراجيل بس أنا عارف اسم الشارع بتاعه، وبعدها وإحنا راجعين قولتله أنت ازاي بتكلم رحاب اللي في الأصل خطيبتي استني نخلص الموضوع ده وبعدين تتكلم معاها. 

عم المجني عليه بجريمة البراجيل: لقيته جثة في الزراعات وعلى صدره حجر

شاهد عيان على جريمة البراجيل: لقيت المجني عليه مرمي بين الشجر وفوق صدره حجر كبير| خاص

وأكمل المتهم: رد عليا بالضبط قالي بقولك إيه اللي بينكم مش المفروض تستني لغاية ما ننهي الموضوع وبين بعضيكم أنا مليش دخل فيه واللي أعمله ميخصكش يا حسام رديت عليه وقولتله إزاي يعني مش في بينا عيش وملح، لقيته بيرد عليا ويقولي الملح داب والعيش كلته الكلاب فقولتله، ده ازاي بأبويا وأمي، رديت عليه الشتيمة على طول، قام هو واقف بالمكنة بتاعتي ونزل منها نزلت وراه لقيته بيشتمني تاني، قومت قايله أنا أتخنقت منك ومسك فيا من فوق هدومي وأنا مسكت فيه من فوق هدومه وفضلنا ماسكين في بعض لغاية من قوة مسكني ليه وهو برضوا ماسك فيا من هدومي، فوقع على الحجر بوشه. 

واختتم: وأنا وقعت من فوق منه بس وشي لظهره قمت عدلته على ظهره لقيت وشه كله جاب دم وبالذات من مناخيره والحجر اللي وقع عليه لقيته برضوا فيه دم وقعدت أزق في الحجر الكبير اللي كان موجود على الأرض اللي سيد وقع عليه بوشه لغاية ما الحجر بقا فوق صدر سيد وقومت واحد الشبشب بتاعه وراميه بعيد في الزراعات الأراضي الزراعية، وبعد كده حطيت إيدي في جيوبه وخدت التليفون بتاعه والفلوس وبطاقته ورخصه بتاعة المكنه كده كانت في جيبه، وبعد كده ركبت المكنه بتاعتي ومشيت على طول وهو ده كل اللي حصل.