شيرين عبد الوهاب لـ محامي روتانا: مشاكلي بتحصل في كل بيت.. لكن عشان أنا مشهورة كبرت
كشفت الفنانة شيرين عبد الوهاب، سعادتها بردة فعل الجمهور بعد طرح أحدث أغانيها أمس، اللي يقابل حبيبي، وبتمنى أنساك، على صفحاتها الرسمية بمواقع التواصل الاجتماعي.
وقالت الفنانة شيرين عبد الوهاب في تصريحات خاصة لـ القاهرة 24، ردًا على حذف تلك الأغاني من قِبل شركة روتانا صباح اليوم: فيه حاجات مش واضحالهم، بس أنا سعيدة جدا برد فعل الجمهور على أن الأغاني عجبتهم، بس عايزه أرد على محامي شركة روتانا رضا صقر.
وأضافت شيرين عبد الوهاب موجهة حديثها لـ محامي شركة روتانا: أنا حابه أقوله أن حضرتك ظلمتني، وأنا مضيت مع روتانا من سنين كتير أوي من حوالي 5 سنين، فهل حضرتك سمعت طول الـ 5 سنين أني طلعت قولت أي حاجة على الشركة أو مسؤوليها، أو عن اللي بيعملوا معايا، لما تقول أن اسم شيرين مرتبط بالمشاكل، حرام عليك، أول حاجة مشاكلي دي كانت مشاكل شخصية وبتحصل في كل البيوت.
وأكملت شيرين عبد الوهاب: بس عشان أنا ست مشهورة فمشاكلي بتكبر، بس الحمد لله، وربنا يسامحني ويسامح الطرف التاني أن مشاكلنا بقت على العلن، بس أنا أمتى قولت حاجة على الشركة، بس ليه الظلم، ليه مبترجعش لورا شوية وتقول إن الست دي مقالتش حاجة غلط.
واستطردت شيرين عبد الوهاب: ياريت تراجع نفسك والظلم اللي اتعرضتله، وهل فيه فنانة ونجمة في حجمي الفني ومكانتي الدولية، أني أقعد 5 أو 6 سنين مينزليش ألبوم، حضرتك مسألتش نفسك ليه، ليه مسألتش الشركة هي شيرين غلطت في إيه، دا لما فيه واحد عندي غلط وبعت الأغاني لـ أنغامي أنا طردته وطلبت من روتانا أنهم يخاطبوا الشركة دي عشان يسحبوا الأغنية ويبعتلهم إنذار، واللي حصل أنهم بعتولي أنا الإنذار مع إن مفيش ورقة تقول إني موافقة على كدا.
حذف أغاني شيرين الجديدة
يذكر أن الفنانة شيرين عبد الوهاب، فوجئت صباح اليوم الأربعاء، بحذف شركة روتانا لـ أغانيها الجديدة اللي يقابل حبيبي، وبتمنى أنساك، وبدورها أرسلت إنذارًا عبر محاميها، ياسر قنطوش لـ روتانا، وطالبت بتعويض عن خسارتها، مؤكدة أنه تم فسخ التعاقد بينهما وسددت 8 ملايين جنيه.
