شيرين عبد الوهاب: روتانا هتدفع تعويض.. ونزلوا 3 أغاني دون الحصول على تنازل مني
قالت الفنانة شيرين عبد الوهاب في تصريحات لـ القاهرة 24، إن القضاء حكم لصالح شركة روتانا بـ 8 ملايين جنيه، وقد قامت بدفعها دون الحديث عن الأمر.
وأضافت شيرين عبد الوهاب ردًا على تصريحات محامي شركة روتانا: حضرتك لما تبقى محامي، لازم تكون دارس اللي بتقوله، الشركة دي مفروض تنتج أغاني للفنانين، وأنا سلمت كل الأغاني المطلوبة مني. بعد كده، إزاي شركة تنزل 3 أغاني لفنانة من غير ما تاخد تنازل صوتي؟ يعني حضراتكم اللي مأخدين بحقوق العقد، وحضراتكم اللي هتدفعوا تعويض.
وتابعت شيرين: ياريت لما تتكلم عن نجمة زيي، تشرف أي شركة تتعامل معاها، تشوف الظلم اللي وقع علي. وأنا مش هقول غير حسبنا الله ونعم الوكيل. يكفيني أن أغانيي نجحت وكسرت الدنيا بدون أي شركة، والناس هي اللي بترفعني. مفيش حاجة هتكسرني، رغم أني دفعت فلوس كتير جدا في الأغاني دي. نزلتها ببلاش عشان الناس كانت تعبانة من مشاكلي الشخصية، وعايزين يشوفوا أعمال فنية جديدة.
تصريحات شيرين عبد الوهاب
واختتمت شيرين بقولها: يوم ما أنزل أعمال فنية، الشركة بتحاربني. كنتوا فين من 5 سنين؟ ليه كل ده بدأ يحصل لما قررت أنزل شغل منفرد بعد انتهاء عقدي؟ الناس في ظهري.
وأضافت شيرين عبد الوهاب موجهة حديثها لـ محامي شركة روتانا: أنا حابه أقوله أن حضرتك ظلمتني، وأنا مضيت مع روتانا من سنين كتير أوي من حوالي 5 سنين، فهل حضرتك سمعت طول الـ 5 سنين أني طلعت قولت أي حاجة على الشركة أو مسؤوليها، أو عن اللي بيعملوا معايا، لما تقول أن اسم شيرين مرتبط بالمشاكل، حرام عليك، أول حاجة مشاكلي دي كانت مشاكل شخصية وبتحصل في كل البيوت.
