حودة بندق: أنا مش مصنف مطرب مهرجانات.. ودخلت اللون ده بسبب قلة الإنتاج
تحدث المطرب حودة بندق عن سبب اتجاهه لغناء المهرجانات بجانب الألوان الأخرى التي قدمها في بدايته، مشيرًا إلى أن المهرجانات ساعدت في شهرته، مؤكدًا في الوقت نفسه أنه لا يصنف مطرب مهرجانات لأنه يقدم جميع الألوان.
حودة بندق: اتجه للمهرجانات بسبب قلة الإنتاج
وقال حودة بندق في حواره مع القاهرة 24، إنه اتجه للمهرجانات بسبب قلة الإنتاج، موضحا: بدأت أقدم مهرجانات في 2014، بأغنية اه يا دنيا يا عندية وربنا كرمنا وانتشرت بشكل غير عادي، ومن هنا بقيت أقدم المهرجان بشكل أكبر لأن مكانش فيه إنتاج لأني في 2013 مضيت مع شركة إنتاج وفضلت معاهم لحد أواخر 2014 وخلال كل المدة دي عملت غنوة واحدة وكانت ديو غنائي وسبت الشركة ومكانش قدامي غير المهرجانات والنوعية دي من المزيكا هي اللي منتشرة، ولكني قدمتها بشكل مختلف وجبت كولة وكمانجا، وبالفعل الغنوة نزلت ونجحت واتشافت وبعدها عملت غنوة يا بنات حلوين حلوين، وكانت الانتشار الأكبر وحققت حوالي 250 مليون مشاهدة والانطلاقة الأكبر كانت من هنا.
وأضاف حودة بندق: قبل الانطلاقة والشهرة كنت قبلها قدمت الزوجة الرابعة مع مصطفى شعبان عام 2012 وبرنامج صولا مع أصالة وشيرين وقبلها تتر فيلم البار في 2008 والحدث الأكبر بالنسبة لي كان جورج وسوف لأنه دعمني وشافني في حفلة وخدني بالحضن، واتكلم معايا في حاجات كتير وبعد الحفلة قابلته في فندق وطلبني وقعدت معاه يومين والمهرجانات ساعدت في شهرتي، وأنا مش ضد المهرجانات لكن ضد اللي بيقول كلام مش حلو، وقدمت مهرجانات كتير ولذيذة وأغانيا مش مهرجانات صرف ولكن دخلت عليها نوع موسيقى تاني.
وأكمل حودة بندق: أنا مش مصنف مطرب مهرجانات ولكن عندي أغاني كتير غير المهرجانات وناجحة ودرما بحت زي أغنية كان ليا حبايب، وحققت أرقام كبيرة والمشاهدات دي في شكل المزيكا ده كبيرة جدا.
